Serchhip District tan VVPAT lo thleng

Lok Sabha inthlanpui neih tura Serchhip District chhunga Polling Station 77 a hman tur Voter Verifiable Paper Audit Trail (VVPAT) chu Zirtawpni kalta khan Serchhip rawn phurh thlen a ni.

Thla thar ni 9-a Lok Sabha inthlan leh 28-Hrangturzo (ST) AC bye-election a hman tur heng Voter Verifiable Paper Audit Trail (VVPAT) te hi ven-himna khauh tak hnuaiah rawn phurh niin tun thla ni 21 chawhnu dar 2:00 khan Serchhip rawn thlenpuiin Serchhip District Election Officer, District Bawrhsap leh Returning Officer, 28-Hrangturzo Assembly Bye-Election ni bawk Dr. Franklin Laltinkhuma chuann a lo dawng a, heng khawlte hi venhimna uluk tak hnuaiah official ten an endik vek a, uluk taka chhinchhiah fel vek a nih hnuah Strong Room-ah dah fel nghal vek a ni. VVPAT hi nikum November thla a Mizoram-a MLA inthlanpui ah khan Aizawl District chhunga bial engemaw zatah chuan hman a lo ni tawh a, Mizoram hmun angah chuan kan hman vawi khatna tur a ni. He khawl hi EVM khawl pangngai nen thlun-zawmin vote thlaktu in a vote thlak duhna ngeiah a thlak em tih lehkha hmanga lantir nghal thei khawl a ni a, inthlan result-ah rinhlelhna emaw complaint emaw a awm chuan he khawlin vote thlaktute vote thlak zawng zawng paper hmanga a lo print chhuah thlap hmangin awlsam leh rintlak takin a endik leh theih vek dawn a ni. He thil hi thil thar ni mahse EVM pangngai tho hmanga vote thlak tur a nih avangin mipuite tan engmah hriatthiam loh tur a awm dawnlo a ni.