Vaivakawn Elevated Road lungphum phumin PWD Schedule of Rates tlangzarh a ni

Aizawl Vaivakawn-a Traffic jam leh kawng chep tih thawl nana duan, Vaivakawn Elevated Road lungphum chu Ningani kalta khan PWD Minister Vanlalhlana chuan a phum.
Hemi puala Vaivakawn YMA Hall-a hun hman ah PWD Minister Vanlalhlana chuan Vaivakawn chu Veng pawimawh tak, Motor tlan tlang tamna a ni tih sawiin, Traffic Jam leh kawng chep a nasa thin tih a sawi a, a chhawk nan leh kawng tih thawl nana hetiang Elevated Road siam a ni tur chu lawmawm a tih thu a sawi a. He project thar hi hnathawh tan vata, zawh vat tum a ni tih sawiin, a thawktu tur te, Veng mipuite leh hotute theihtawp chhuah tangrual turin a sawm a ni.

He project bakah hian PMGSY hnuaia kawng siam nan Mizoram sawrkar chuan cheng vbc. 720 a dawng bawk tih PWD Minister chuan sawiin, Aizawl khaw chhung kawng siam hna te pawh tan chhoh tum a nih thu leh, kawng 58, a belh khawma km 87 a sei chu siamthat tan a nih dawn thu a sawi a. Project hrang hrang - Bawngkawn RCC Arch Bridge, Aizawl-Durtlang-Kawnpui road te, World Bank By-pass Road te, Bawngkawn West - Hangi Lunglen Tlang road te leh kawng dang tam tak hmachhawp tha tak tak a awm tih sawiin, Mizoram chu infrastructure-ah a changtlung chho mek tih a sawi bawk.

Vaivakawn Elevated Road hi SASCI 2025-26 Part-V atanga sum dawn tur niin cheng vbc. 35 man tur a ni a. Kawng chep avangin motor tlanna tur dang a siam anga, Kanan Veng, Chawnpui leh Luangmual Road a pawh anga, Vaivakawn Market sak tum mek tho chu a kaltlang dawn a ni. Meter 80 a sei, meter 10.5 a zau, meter 20 a sanga sak a ni ang a, chhawng riat (8) a ni ang a, a vaiin 4339 sq. meter tura duan a ni.

He hunah hian PWD Minister Vanlalhlana chuan PWD Schedule of Rates 2026 chu a tlangzarh nghal a, hei hi Mizoram PWD-in building sak nana rate a hman a ni a. A hmasa zawka hman hi February 2019 khan tihchhuah niin item 717 a awm a, thil man to zel chu chhut tel a ngaih tak avangin Cost Index chhutchhuah a ni a, hemi hmang hian rate thar siam niin hman tan nghal turin tlangzarh a ni a. Schedule of Rates tharah hian item 781 a awm a ni.