Thil thar tha zawk ngaihtuah chhuak thiam Officer kan mamawh - Chief Minister

Chief Minister Lalduhoma chuan khawvel a inthlak chak em em tih sawiin nimin-a amah kawmtu MSS Officer te hnenah sawiin, “Thil thar tha zawk ngaihtuah chhuak thiam Officer kan mamawh,” a ti a, chhungkaw tha din chu kan khawtlang leh ram tana thil tangkai tak a nih thu a sawi bawk.
Administrative Training Institute (ATI)-a Foundation Training nei mek, Mizoram Secretariat Service (MSS) Officer-te chu nimin khan Chief Minister Lalduhoma chuan CM Conference Hall-ah kawmin sawrkar file kalpuinaa note siamtu pawimawh ber zinga mi an ni tih sawiin, “Sawrkar dan leh a Amendment te in hriatchian hle khan thutlukna siam kawngah kan tangkaipui thin,” a ti a. Service Association a kawmte hnena a sawi zel thin chu Service Rivalry (Service inkara inerna) awm thin tha an tih loh thu a ni tih sawiin, “Sawrkar pakhat hnuaia thawk vek in ni a, ram tana thawkho vek in ni. Tin, sawrkarin tul a tih angin hnathawktute hi a siksawi thei tur a ni,” a ti a. “Hun vawn dik hi a tha a, kan thawhpui leh kan hnuaia mite hre rengin, a tul bak bak Office-ah kan awm khaw tlai fo tur a ni lo. Hna tam tak hi chu Office hunbi pangngaia thawh theih an ni a, tlai taka kal a, tlai taka bang lovin, a hun taka thlen a, a huna haw mai tur a ni,” a ti.

Hmathlir fel tak neiin an kal tih Chief Minister Lalduhoma chuan sawiin, “Flagship Scheme te kan nei a, khang kan Flagship te kha kan ngaipawimawh a, sawrkar hnathawkte pawhin lo ngaipawimawh ula ka duh. Khawvel a inthlak chak em em a, thil thar tha zawk ngaihtuah chhuak thiam Officer kan mamawh,” tiin “Mahni chhungkua theuh vil tha ila, chhungkaw tha i din ang u. Chu chu khawtlang leh ram tan thil tangkai tak a ni,” tiin MSS officer-te hi a fuih a ni.

He hunah hian Trainee te hi ATI Director Rita Lalnunmawii Pachuau leh a thawhpui ten hruaiin sawrkar inrelbawlna kawng thil pawi-mawh hrang hrang an sawiho bawk a ni.