Thenzawl Vengthar VC by-election-a hman tur Electoral Roll tlangzarh
Thenzawl Vengthar VC Final Roll hi nimin khan Serchhip District Election Officer, Paul L. Khuma chuan Serchhip DC Meeting Hall-ah tlangzarhin kumin-ah East Lungdar VC by-election chu felfai taka neih a nih tawh thu sawiin, Thenzawl Vengthar VC by-election pawh tluang tak leh felfai taka neih leh ngei a beisei thu a sawi a. He VC Inthlanna neih tura Vote nei thei awmdan tlangpui tarlangin Electoral Roll hi a tlangzarh a, ERO, AERO leh VLO bakah Political Party hrang hrangte hnenah Electoral Roll thar copy a sem nghal a ni.
Thenzawl Vengthar VC hi Seat pathum (3) awmna niin chhan eng eng emaw avangin thiah a ni a, hei vang hian by-election hi neih ngaiin Oct. 5, 2026 khan Draft Electoral Roll tarchhuah a ni a, dilna lut hrang hrang te enfiaha siamthat a nih hnuah Final Roll hi tarchhuah a ni ta a, Final Roll atanga a lan danin Thenzawl Vengthar VC-ah hian In 124 awmin Vote nei thei mipa 155 leh hmeichhia 186, an vaiin 341 an awm dawn a, Draft Roll aiin Vote nei thei hi 31 in an tlem zawk a, In awm zat pawh 6-a tlem zawkin hei hi VC leh YMA ramri a inan loh avanga ramri siamthat ah insawn an awm vang a nih thu Electoral Roll buaipuitute chuan an sawi a ni.
Election Officer Lalchhanhimi chuan VC Electoral Roll atan hian tehfung atan 1.1.2026 hman a nih thu sawiin, October ni 5, 2026 khan Draft Electoral Roll tlangzarh a nih thu a sawi a; belh leh paih ngaite siam thatna hun atan October ni 5 atanga ni 15, 2026 thleng hun hawn a ni a. Hemi hun chhunga dilna lut te chu Oct.ni 16 - 23, 2026 chhung khan chinfel niin Oct. ni 24 - 31, 2026 chhung khan Roll ennawn leh chhutchhuah hna thawh leh a nih thu a sawi bawk.
Thenzawl Vengthar VC by-election neih hun tur hi puan la ni lo mah se kumin chhung hian inthlanna hi neih hman rin a ni.