Surakshit District pali te lawmpuina hun hman a ni
Nimin a Royale Lalawi Hotel, Conference Hall-a he hun hman hi Health & Family Welfare Department changtu Minister Lalrinpuii chuan hmanpuiin Mizoram hmasawnna a taka tarlanna tura District palite lawmpuina leh chawimawina hun an hmang thei chu lawmawm a tih thu a sawi a. National AIDS Control Organisation (NACO) ruahmanna hnuaiah 1st December 2026 ral hmaa 95:95:95 Target leh Triple Elimination (nu atanga naupai laia HIV, Syphilis leh Hepatitis-B-te inkaichhawng tur umbo) hlawhtlin a, chumi hmanga 1st December 2027-a HIV, Syphilis leh Hepetatis B hri darh zel control hman chu sawrkar thiltum lian ber a ni tih a sawi.
Health Minister chuan he hmalakna hnuaiah target pathumte tlin vek a, Surakshit District nihna changtu District pali-Khawzawl, Saitual, Mamit, leh Hnahthial-te thawhhona leh inpekna chu fakawm a tih thu sawiin, heng District-a Sawrkar hotute, Tlawmngai pawl leh Kohhrante chu tha thlah lova tang zel turin a fuih a. Hetih rual hian Saksham District panga (Siaha, Lawngtlai, Serchhip, Kolasib, Champhai) leh Sangharsheel District pahnih (Lunglei leh Aizawl)-te pawh thahnemngaihna thar nen tan la zual sauh a, Surakshit dinhmun thleng thuai thei khawpa tan la turin a chah bawk a ni.
NACO in Mobilisation AIDS Suraksha (MAS) Campaign a kalpui hnuaiah hian District hrang hrang te chu tehna siam niin an tehna chu ‘95-95-95’ target a ni a. Hemi awmzia chu HIV hrik pai zawng zawng zinga 95% in hrik an pai tih an inhre tur an ni a, hei hi 1st 95 tih a ni a, HIV kai, an dinhmun hre zawng zawng zinga 95% in Antiretroviral Therapy (ART) an ei tur a ni leh a, hei hi 2nd 95 a ni ve leh thung a, ART ei zawng zawng zinga 95% chu an Viral load a tlahniam tur a ni leh a, hei hi 3rd 95 tih a ni leh bawk.
Heng tehna pakhat-a tling te hi ‘Sangharsheel District’ tih an ni a, Target pahnih tlin te chu ‘Saksham District’ tih ni ve lehin a pathum a tling vek te chu ‘Surakshit District’ tih an ni ve leh a. Heng bakah hian ‘Surakshit+’ awm lehin hei hi Target pathum tlin vek bakah nu atanga nausen-a HIV inkaichhawng awm lo an ni ve leh thung a ni.
Nimin-a he hun hman hi MSACS Project Director Dr. Jane Rinsangi Ralte chuan kaihruaiin District hotute chuan Surakshit dinhmuna hlan kai an nihna kawnga hma an lakdan tlangpuite sawiin, Dr. Lalnunhlima Khiangte, Joint Director (BSD), MSACS-in lawmthu a sawi a ni.