Sawrkar hna lak-ah duhsak bik neih loh vangin Party mi te an vui hial niin sawi

ZPM Vice President leh Adviser to Chief Minister, Lalmuanpuia Punte chuan, “Kawng engkimah kan sawrkar hian thil tih tak tak kan tum,” tiin sawrkar hna lak chungchang ah duhsak bik an neih loh avangin an Party mi te pawh an vui hial niin a sawi.

ZPM Chhung Inkhawm nimin-a Aizawl-a an party Office-a neih ah ZPM Vice President Lalmuanpuia Punte chuan sawrkar hmalakna hrang hrang tarlangin, “Tunhnaiah Home Guard lak a ni dawn a, dik leh fair takin Home Minister-in a kalpui leh dawn a ni,” a ti a. “Kan sawrkar atang hian hna lak leh thil dang dang hi kan theih tawka mumalin kan kalpui. Party dang lo sawrkar tawhten an mi duhsak zawngte advertisement tel lova an lak vak vak ang kha an nghet hlei thei lo a, dan mumal lo deuha an lo la thin kha an khawngaihthlak letling hle; chutiang chu keini chuan kan ti ve lo. Advertisement leh Written Test nen uluk takin hna kan la thin a, duhsak bik kan neih loh vangin kan party mite pawh an vui hial thin a ni,” a ti.

Kawng engkimah an sawrkar chuan thil tih tak tak an tum tih pawh ZPM Vice President chuan sawiin, “Pension dik lova la an rawn surrender avang hian sawrkarin kumtin cheng vbc. 15 bawr vel a hum thei dawn a ni,” a ti a. “Ruihhlo do kan han bei tak tak a, Operation Jericho-ah hian khaw 13 Police awm miah lohnaah Police kan dah a. Central YMA-in theihtawp chhuahin sawrkar a thlawp a; khawchhak lama YMA Branch tlawhchhuakin, sawrkar hmalakna thlawp tura an tihnaah te hian Central YMA chungah sawrkar a lawm hle a ni,” a ti bawk.

Chief Minister leh Home Minister te, Excise Minister leh Social Welfare Minister te pheikhai rual takin an tang tlang tih pawh ZPM Vice President chuan sawiin, “Hnahthial, Khawzawl leh Lawngtlai-ah te tunhmaa Narcotics lam Inspector hova awm thin kha tunah chuan Assistant Commissioner hovin an thu vek tawh. LESDE-ah hian cheng Vbc. 25-in ITI te sak that a ni a. Revenue Department chungchangah kan Minister-in tih tak takna nen a han beih chuan Maumual-ah ringawt pawh Pass 456 lai tihfel a ni a, Ramhlun lamah leh Zemabawk leh Chek-bawk-ah te pawh tihfel a tam hle, hengte hi kan inchhuanna ni mai lovin, tih tak takna nena hna thawk Minister kan neih vang a ni,” tiin sawrkar chuan hma a lak zel thu a sawi bawk a ni.