Sangau khuaa leimin avanga harsatna tawk te suanchhuah dan tur ngaihtuah a ni

Nimin khan 'Lawngtlai District Level Commitee on Relocation of Affected Families in Sinking Area, Sangau IV' chu thukhawmin Sangau khuaa leimin avanga harsatna thleng te an thlirho.

He thutkhawm Sangau BDO Conference Hall-a neih ah hian Lawngtlai Bawrhsap Donny Lalruatsanga chuan Sangau IV lei tlahniamin harsatna tam tak a thlen chu mimal tak pawha pawi a tih thu leh District Disaster Management Authority-a Chairperson a nihna ang pawha theihtawp a chhuah reng thu a sawi a, Sawrkarin tanpuina a pek theih chin hriatthiam a pawimawh thu leh lungawi thiam pawh a tul hle tiin, an thurel chu Mizoram Sawrkarah thlen leh a ni ang tih a sawi bawk.

He hunah hian Adviser to Chief Minister leh Lawngtlai East Bialtu MLA, Dr. Lorrain Lalpekliana Chinzah chuan lei tlahniam vanga harsatna tawkte dinhmun thinlung taka hriatthiampui thu sawiin, DC leh Sangau IV VC leh YLA-ten theihtawp an chhuahna pawh a fakawm a tih thu a sawi bawk a. Lai Autonomous District Council-a Revenue Officer, Alex Lalzawmpuia pawhin report pein lei tlahniamin a nghawng chhungkuate tan ram mamawh a nih thu pawm tlangin, Revenue Department (LADC) in December thla chhungin ram lo zawnsak se, insawn duhte hnenah chauh LSC hi pek nise an ti a. State leh Central Sawrkarah chhungkaw insawn turte tan tanpuina sum leh pai dil sak th an ti bawk.

Adviser to Chief Minister, Bawrhsap leh sawrkar Official-te hian lei tlahniam hi a hmunah an enfiah nghal a. Sangau IV lei tlahniam hi kum 2019 atanga intan niin, kum 2024 khan tlahniam nasa zualin tun thleng hian a tlakhniam belh zel a. Lei tlahniam ah hian mimal In 46, Anganwadi Building pakhat, Biak In pakhat, Quarters pakhat leh VC House pakhat awm mekin, Chhungkaw 67 ten harsatna an tawk mek a. Kum 2024 khan chhungkaw pahnih chu sawnchhuah an lo ni tawh bawk a ni.