Remsiami hnenah Arjuna Award
National Sports Awards semna hun hi Zirtawpni kalta chawhma dar 11:00 khan New Delhi-a Rashtrapati Bhavanah neih a ni a, kumin hian mi 17 te hnenah India rama infiammi te chawimawina sang ber dawttu Arjuna Award (Regular) hi hlan niin an zingah hian Mizo nula Lalremsiami hi a tel a, Mizote zinga he chawimawina dawng thei hmasa ber niin kumin hian mi pakhat hnenah Arjuna Award for Lifetime Achievement hlan a ni bawk.
Olympian Lalremsiami hian India Hmeichhe Hockey Team chu Asian Games-ah Gold, Silver leh Bronze a lakpui tawh a, kumin a Gold an lak theih nan ab chakna goal a khung a. Arjuna Award hian pawisafai cheng nuai 15 a keng tel a, he chawimawina a dawnna ah hian Remsiami hi a nu Lalzarmawii leh Hockey Mizoram President Lalrampari ten an tawiawm a ni.
Lalremsiami hian Mizoram atanga Arjuna Award dawng thei hmasa ber a ni chu a ngaihhlu in a lawm hle tih a sawi a, he Award hian ram leh a Team tan a hma aia rim zawka theihtawp chhuah duhna a pe tih sawiin, thangthar zawkte pawh chona leh phurna a pek ngei a rin thu a sawi a. “He chawimawina hi thangthar te, a bikin India rama thalai zawng zawng te leh, a bikin Mizoram thalaite tan ka hlan a ni. Keini tan chuan Arjuna Award ang chawi-mawina zahawm tak dawn hi suangtuah phak pawh a ni ngai lo. Mahse, Vawiin ah chuan ka dawng ta a, Mizoram-ah hian thalai thiamna nei tha tak tak tam tak an awm tih ka ring a ni. Chuvangin, hei hi an tan entawn tur tha tak a ni a. Tum lian tak an neih a, taima taka an thawh zel chuan hetiang hun remchang hi an tan pawh a inhawng ve reng a ni,” tiin Hockey khel duh naupang te chu a theih anga tanpui a tum dawn thu a sawi bawk.
Arjuna Awards 2026 dawngtute :
Tejaswin Shankar (Athletic)
Muhammed Ajmal V (Athletics)
Priyanka Goswami (Athletics)
Treesa Jolly (Badminton)
Pullela Gayatri Gopichand (Badminton)
Narender (Boxing)
Vidit Santosh Gujarathi (Chess)
Divya Jitendra Deshmukh (Chess)
Dhanush Srikanth (Deaf Shooting)
Lalremsiami (Hockey)
Rajkumar Pal (Hockey)
Surjeet (Kabaddi)
Pooja (Kabaddi)
Rudransh Khandelwal (Para-Shooting)
Ekta Bhyan (Para-Athletics)
Arvind Singh (Rowing)
Akhil Sheoran (Shooting)