Prime Minister-in Ropuiliani Tribal Freedom Fighters Museum hawngin CM-in ‘Ropuiliani lim’ a hawng

Ministry of Tribal Affairs hmalakna a Kelsih-a ‘Ropuiliani Tribal Freedom Fighters Museum’ sak chu nimin khan Prime Minister Narendra Modi chuan biak hmuh theihna kaltlangin a hawng a, Chief Minister Lalduhoma chuan Ropuiliani lim a hawng bawk.
Nimin-a hemi puala hun hman ah hian Prime Minister Narendra Modi chuan Janjatiya Gaurav Diwas puala India ram mipuite chibai bukin, zalenna sualtu Tribal-te zahna chibai a buk a, he ni hi Tribal-te hnam ziarang leh nunphung hausa tak bakah ram tana an tha thawh chawimawina a ni tih sawiin, Sawrkar laipuiin hmasawnna huapzo a ngaih pawimawh thu leh Tribal-te hamthatna leh hmasawnna tura kawng hrang hranga hmalak a nih dante a sawi bawk.

Nimin November ni 15 kha India ramin zalenna a hmuh theih nana Tribal hruaitu hriat hlawh tak, British dodala ‘Ulgulan Movement’ kaihruaitu Dharti Aaba Bhagwan Birsa Munda pianchamphaphak vawi 151-na a ni a. Hemi pual hian India ram pumah 'Janjatiya Gaurav Diwas -Tribal Pride Day' lawm a ni a. Prime Minister chuan Gadchiroli, Maharashtra-a hun hman biakhmuh theihna kaltlangin a hmanpui a, hei hi Mizoram atang pawhin chhim a ni a. He hunah hian Prime Minister chuan Tribal-te chawikan nana project hrang hrang 246, cheng vbc. 3000 vel bawr hu hawnna leh lungphum phumna hun a hmang a. Heng zingah hian Kelsih-a Ropuiliani Tribal Freedom Fighters Museum bakah Ekalavya Model Residential School (EMRS), Zawlnuam te chu hawn tel niin, Eklavya Model Residential School (EMRS), Pangzawl South sakna tur lungphum phum a ni bawk.

Ropuiliani Tribal Freedom Fighters Museum huam chhungah hian Museum, Open Air Theatre, Traditional Hut, Heritage Walk, Birsa Munda Tribal Pride Garden, Cafeteria, Staff quarters leh adangte a awm a. Hengte hi Chief Minister chuan fang kualin hmalak dante a enfiah a. Chief Minister hian ‘Ropuiliani lim’ hawngin British ho awpbeh tumna duh lova beilettu Lal leh mi huaisen tak tak Mizote'n kan neih nual thu sawiin, ram leh hnam chhan nana nunna chante zinga mi Lalnu Ropuiliani inpekna chu chhuanawm a tih thu a sawi a. Mizote chu ram leh hnam chhan nana zam ngai lo, tlawm duh lova a tawp thlenga tang tlat thin kan ni tih hre thar leh theuh turin he huna kalkhawmte chu a chah bawk a ni.