PES Serchhip-ah Cricket zirna kalpui

Serchhip District Cricket Association (SEDCA) leh Presbyterian English School (PES), Serchhip te chu Cricket Academy kalpui turin an thawkdun dawn a, hei hi Serchhip District-a Cricket Association of Mizoram (CAM) hriatpuinaa Cricket Academy kalpuina hmasa ber tur a ni.
Nimin khan he Cricket Academy kalpui tur ‘Vuak hawnna’ hi PES Serchhip-ah neih a ni a, SEDCA Secretary, Malsawmkima chuan Report pein CAM-in duhsak taka School thawhpui tura phalna an pe chu lawmawm a tih thu a sawi a. SEDCA President R. Lalrinawma chuan CAM Hony. Secretary Lalfakawma Varte thuchah chhiarin, naupangte chu ruihtheih thila fihlim tur leh tih takzeta Cricket zir turin a fuih a, CAM hruaitute hian Cricket khel chunga zirna an ngaih pawimawhzia sawi telin, PES naupangte pawh zirna leh Cricket chu kal kawppui thiam turin a chah bawk a ni.

He hunah hian PES Serchhip Principal, Ramluah-puia chuan Serchhip khawchhunga Sports Discipline dangte pawh thawhpui tura an sawm thin thu leh an duh ang taka thawhpui tur an hmuh theih loh thu a sawi a. SEDCA nen thawkdun tura inremna an nei thei ta chu lawmawm a tih thu a sawi bawk.

He Coaching kalpui tur hnuaiah hian kar tin Ningani leh Zirtawpni tlai School ban apiangin Cricker hi zirna an kalpui anga, Cricket zirna atana tul te CAM lamin an tum anga, R. Lalrinfela, Serchhip chu Head Coach a ni ang.