Mizoram State Central Library tlawhtu 9,139 awm
Akashvani News Aizawl in thu a dawn danin Mizoram State Central Library hi kumin January atanga October thla chhung khan mi 9,139 in an tlawh a. Hemi hun chhung vek hian Member-a inziaklut mi 450 an awm a, State Central Library hmang tangkaitu leh tlawhtute zingah hian zirlai 3,524 awmin, thalai hna zawng mek leh lehkhabu chhiar tura tlawh hi mi 5,509 an awm a, Research Scholar 106 an awm bawk. Mizoram State Central Library-ah hian Lehkhabu chi hrang hrang chhiar tur 74,293 a awm a, January leh October thla inkar chhung khan lehkhabu 4,132 hawhchhuah a ni a. State Library hnuaiah hian sawrkar pawmpui tlawmngai pawlte Library 518 an awm bawk.
Library-a lehkhabute hi Software application hmangin kum 2014 atang khan computerised vek a ni a. Nikum 2025 atang khan LIBSYS Software chu KOHA Application Software hmanga thlak a ni a, Aizawl Smart City Ltd. hmalaknain kum 2025 atang khan Digital e-Library hman theiha siam a ni bawk.
Kum 2022-ah IAS/Civil Service Corner din a ni a, thalai ten an hmang tangkai hle a, a bikin hna zawngte’n an chhawr hle a ni. Lehkhabu pawh a theih ang anga tih changtlun a lei belh zel a ni a. Library Service pawhin hma a sawn ve zel a. Zirlai, Research Scholar leh hna zawngten a bik takin an hlut a, an hmang tangkai em em a. Mizoram State Central Library chu thalai tam thei ang ber ten hmang tangkai zel turin leh inthlahrung hauh lo a tlawh thin turin mi zawng zawng an sawm thu a enkawltute chuan an sawi bawk a ni.