Mizoram House hralh chungchang ngaihtuah
Calcutta High Court Division Bench chuan Kolkata Old Ballygunj-a Mizoram House hralh chungchanga Mizoram sawrkarin High Court thutlukna a khinletna chu a hnawl.
Mizoram Sawrkarin appeal thehluh hi Justice Arjit Banerjee leh Apurba Sinha Ray-te thutna Division Bench chuan hnawlin, Mizoram-a sawrkar inthlak avangin Kolkata-a sawrkar ram Excel Vincom Private Limited hnena hralh tura inremna siam chu a thiah theih loh thu an sawi a. Court chuan sawrkarna inthlak avanga ram lei tawh thiahna hi ‘regime revenge’ thubuai tiin a sawi a. Mizoram sawrkar chu chawlhkar 8 chhunga hralhna lehkha buaipui nghal turin a hriattir a ni.
Kum 2023 May thla khan sawrkar chuan he hmun hralh tur hian e-tender-cum-e-auction a chhuah a. Excel Vincom Private Limited chu Tender chhang sang ber niin he mi kum vek October ni 6 khan cheng vbc. 38.3-a hralh turin inremna ziahfel a ni a. Hemi kum December thla a State sawrkar a inthlak tak avangin ‘mipui leh sawrkar tana tha lo a ni’ tih chhuan lamin Tender kalpui lai chu tihtawp a ni a. Kolkata Mizo Students leh Calcutta Mizo Welfare Association ten he hmunin history-a pawimawhna a neihte leh Kolkata-a Mizo zirlai leh hnathawkte tana inngahna pawimawh tak a nih thu chhuanlamah hmangin ,Mizoram Sawrkar chuan High Court hmaah he inremna tihtawp hi politics thil vang ni loin, Kolkata-a Mizo awmkhawm, inpawh tak takte rilru leh duh dan ngaih pawimawh vang zawk a ni tiin a sawi a. Chu bakah inhralh inremna pawimawh ber (Final Sale Deed) ziahfel a nih hma chuan neitu nihna (ownership) inhlanchhawn a nih loh thu a sawi a ni.
Chutih laiin Excel Vincom lam chuan inhralhna kalpui lai chu thui tak a kal tawh thu leh, state sawrkar a inthlak tak avanga tihtawp a ni tih an sawi ve thung a. Calcutta High Court Division Bench chuan he thubuai hi ngaihtuahin, Mizoram sawrkar chuan ram inhralhna man chu a dawn kim vek tawh thu leh instalment pek tlai avanga pawisa an chawi belhna thlengin sawrkar chuan a lo dawng tawh tih a hmu chhuak niin a sawi a. Court chuan thubuai tihtawp a tulna chhan ‘Public interest’ chu Mizoram Sawrkar hian a tarlang zo lo niin a sawi a ni.
