Nimin November thlaa Pathianni hmasa ber kha ‘Khawvel Sunday School Ni’ atana hman a nih angin Kohhran hrang hrangte chuan he ni hi urhsun takin an hmang a, chawhma leh chawhnu Inkhawm-ah he ni puala thupui thlan hrang hrang te zirho a ni. Sunday School hi kum 1780-ah England ram, Gloucester khuaa Robert Raikes-a din a ni a. India ramah July 9, 1803 atangin Missionary William Carey-a leh a thiante (Serampore Trio) hmalakna in Sunday School neih tan a ni a. Mizoram-ah pawh Zosap Rev. D.E. Jones-a (Zosaphluia) hmalaknain February 20, 1898 atanga tun thlengin neih a ni. February ni 16, 1944-a MSSU Committee-in a rel angin Mizo-ram-ah chuan kum 1944 atangin Khawvel Sunday School Ni hman a ni a. Kum 1949 atangin November thla Pathianni hmasa berah thupui neia hman a ni.
