Inter-Higher Secondary School Volleyball Tournament khelh zawh a ni ta

Tun thla ni 16 atanga khelh ‘Inter-Higher Secondary School Volleyball Tournament, 2026’ chu nizan hmasa khan Final khelin zawhfel a ni a, Mipa-ah St. Joseph HSS leh Hmeichhia-ah Govt. Central HSS te an Champion.
Mizo Zirlai Pawl (MZP) leh Mizoram Volleyball Association (MVA) te tangkawpin an buatsaih, ‘Inter-Higher Secondary School Volleyball Tournament, 2026’ Final hi nizan hmasa khan Aizawl West Jt. YMA Hall-ah khelh a ni a, he inelna ah hian Hmeichhe-ah Team 12 telin Final-ah Govt. Central HSS chuan Govt. Republic HSS chu 3-0 a hnehin an Champion a, Best Spiker-ah Lalventluangi, Govt. Central HSS leh Best Setter-ah C. Lalhmingmuankimi, Govt. Central HSS te thlan an ni.

Mipa inelna ah Team 17 telin Final-ah St. Joseph HSS  chuan Govt. KM HSS chu 3-0 a hnehin an Champion bawk a, Best Spiker-ah Samson Lalropuia, St Joseph HSS leh Best Setter-ah Joseph Malsawmtluanga, St Joseph HSS te thlan an ni bawk.

Nizan hmasa a he Tournament kharna hun hi Sports Minister, Lalnghinglova Hmar chuan khuallian nia telpuiin infiammite tan a hma aiin sawrkar hnaa luhna kawng a inhawng zau tawh tih a sawi a, “Tunhnaia Excise Constable lak a nih dawnin Physical Fitness in mark pu ngei se kan ti a, a theih loh dan a awm a nih pawhin a rem dan min zawnsak rawh u ka ti. Lehkha thiam sangin hna an dil theih chi tam tak a awm a, lehkha thiam ber pawh ni lem lo te’n an dil ve theih hnaah lehzel WrEtten exam hmang chauha inel chu a felhlel deuhin ka hria a, fitness a pawimawh tur a ni kan ti a. Excise Constable lak hnuhnung berah kha chuan Physical Efficiency Test leh Written Exam in mark inang an pu ta a, lehkha kan thiam ang bawkin kan tlanchakna te, kan zuansanna te'n awmzia a nei tawh,” a ti a ni.