'Green Verified Business Certificate' semna leh 'Mizoram Kailawn 5.0' tlangzarhna hun hman a ni

Tourism Minister Lalnghinglova Hmar hovin nimin khan Raising and Accelerating MSME Performance (RAMP) Scheme hnuaia Green Initiative kaltlanga buatsaih ‘Green Verified Business Certificate’ semna leh ‘Mizoram Kailawn 5.0’ tlangzarhna hun hman a ni.
Planning & Programme Implementation Department hnuaia Mizoram Startup Mission (MSUM)-in RAMP Scheme hnuaia Green Initiative kaltlanga buatsaih ‘Green Verified Business Certificate’ semna leh ‘Mizoram Kailawn 5.0’ tlangzarhna hun Aijal Club McCabe Hall-a an buatsaih ah hian Tourism Minister Lalnghinglova Hmar chuan Tourism sector-in Mizoram-ah hmasawnna lian tak a thlen tir theih thu sawiin, hemi thleng thei tur chuan India rama State dangte lakah Mizoram chu a danglam a ngai a, he danglamna thlen tur hian Green Initiative hi ruahman a nih thu a sawi a. Mizoram chu ramngaw tamna, 85% Forest Coverage hial nei a ni tih sawiin, Mizoram-a thing leh mau te humhalh a nih zel theihnan hmasawnna Mizoramin a kalpuina kawng hrang hrangah sustainable development zawnga kalpui turin kalkawmte a chah a; Environment & Forest Department leh Tourism Department te tangkawpin Mizoram in Tourism a hma a sawn theih nan MoU an sign thute, Aizawl-a Winter Festival lo awm tur pawh Green Festival a nih theih nan hmalak mek zel a nih thu a sawi bakah Tlaizawng Festival lo awm tur pawh Green Festival a nih theih nan theihtawp an chhuah thu a sawi bawk a. Kailawn 5.0 leh Green Certificate semchhuahte hi thalaite leh eizawng mek ten tangkai tak a an hman a, an hlawhtlinpui ngei a duh thu a sawi bawk a ni.

Green Verified Business Certification hi sumdawnna kalpui mekte tana tih a ni a. Sumdawnna kalpui kawngah environment humhalh ngai pawimawh tura hmalakna a ni a. Verification Criteria-ah hian tehfung pariat hman niin - Waste & Material Management, Water Management, Energy Use, Local & Sustainable Sourcing, Food & Kitchen Innovation, Homestay/Tourism Practices, Behaviour & Awareness leh Out-of-the-box practices- te an ni a. Tehfung hrang hrang atanga 70% aia sang hmu chin chu a hmunah endik leh a nih hnuah Green Verified Business Certified pek an ni.

Nimin-a tlangzarh tak Mizoram Kailawn 5.0 hi kum 2017 khan Mizoram State Entrepreneurship Development and Monitoring Committee (MEDMOC) hmalaknain bul tan a ni a. Thalai leh sumdawnna bultantu mi 60 chuang hnenah sumdawnna a rahbi thar an rah theihnan Seed Grant pekchhuah a lo ni tawh a. He Edition tharah hian a hmaa Grant an pek dan kalphung chu kalsanin, intihsiakna hmanga lawmman semchhuaka kalpui a ni a. Intihsiakna hi sumdawnna a bul la tan chiah lo, ngaihtuahna tha tak nei leh an thil siam tur entirna la buatsaih mek te, an product emaw service emaw la zuar chhuak lote puala buatsaih a ni a, he Edition-ah hian Green Entrepreneurship chu ngaihpawimawh zual a ni dawn a ni.

He intihsiakna ah hian a titha zual thlan-chhuah mi 10 te tan lawmman buatsaih tum a ni a, Finalist-te zinga Green Business idea tha zual 5-te chu an thil siamchhuah hmasak tur siam nan RAMP Green Initiative Fund atangin ruahmanna siamsak tum a ni ang a; thlanchhuahte hian mithiamte atangin technical leh business lam thurawn tha tak tak an dawng bawk ang.

Nimin-a he hun hman hi MSUM Executive Committee Chairman David Lalthantluanga chuan kaihruaiin Commerce & Industries Department Director Lalhmunsanga Hnamte leh Planning & Programme Implementation Department Principal Adviser Dr. Lalrinchhana hnen atangin thusawi ngaihthlak a ni. MSUM CEO Lalrinzuala chuan lawmthu sawiin a khar a ni.