Dungtlang Vangpui Kût vawi 40-na Zokhua-ah hman a ni

Environment, Forest & Climate Change Department changtu Minister Lalthansanga chuan nimin khan Dungtlang Zokhua-ah Vangpui Kut vawi 40-na chu Kut Pa niin a hmanpui.
Dungtlang khua in nimin a ‘Vangpui Kut’ an hman ah hian EF&CC Minister Lalthansanga chuan Dungtlang khua chu hman atanga Mizoram khaw hmun pawimawh a nih anga pipu sulhnu an humhalh thatna te, Mizo hnamzia vawnnun kawnga hma an lakna te fakawm a tih thu sawiin, he Kut hi unauna, ram leh hnam tana inpekna thinlung min put thartirtu nise a duh tih a sawi a. Khawvel sik leh sa danglam zelah sawkar leh mipui tanhona avangin Mizoram chu kan State zau zawng ngaihtuaha ramngaw ngah ber kan ni thei chu a lawmawm hle tih sawiin, Mipuiin an chanvo dik tak an chan a, eirukna tel lova ram a kal theihna turin mipuite chu sawrkar thawhpui a, sawrkar hnena an lungawilohna thlen theihna ‘mipui aw’ portal hmang tangkai turin a chah a. Kan ram hi intodelh tura tan kan lak a tul thu sawiin, Dungtlang khua chu hemi kawnga Mizorama hmahruaitu ni tura a duh thu a sawi bawk.

He hunah hian Bialtu MLA, Ramthanmawia chu Kut Thlengtu niin Dungtlang khuaa Mizo hnam ziarang leh hnam lam te phochhuahna hun ‘Vangpui Kut’ hman thin a ni chu lawmawm a tih thu sawiin, Dungtlang khua chu Mizote awm chhung chu hming dai tawh ngai lo tur a nih thu leh Mizo history-ah hian Dungtlang hian hmun pawimawh tak a luah reng dawn thu a sawi bawk.

Nimin-a Vangpui Kut hi Organising Committee Vice Chairman Denny Lalremruata chuan kaihruaiin Dungtlang High School, Govt. Primary School, YMA Khawbung Branch leh Govt. Lianchhiari Middle School (PES Dungtlang) ten Mizo Hnam Lam te an entir a, khawtlang mipui thahnem tak telin sawmbik te atangin thusawi ngaihthlak a ni bawk.