Zirtirtute tana zirna piah lama activity tam lutuk chu Ministry lamah sawi a ni
Dawrpui Multipurpose Centre-a Mizoram Primary Teachers’ Association (MPTA) General Conference-ah hian School Education Minister Dr. Vanlalthlana chuan MPTA harsatna leh sawrkar hmalakna te sawiin, “Zirna ngai pawimawh Chief Minister kan nei hi kan vannei hle a, Zirtirtu 671 lak phalna Sawrkarin min pe a, heta tang hian kum 2026 chhung hian Primary Zirtirtu a nghetin mi 100 la turin buaipui chhoh mek a ni,” a ti a. Text bu indaihlohna chungchangah kumin atangin chinfel a nih thu leh nakum lama sem tur pawh buaipui chhoh a ni lehtawh tih sawiin, “A hun taka sem leh theih ngei tum a ni,” a ti a. Primary Section-a Pawl 5 dah chungchang pawh sawiin, “A Room tur lam tihfel hmasak a ngaih avangin tih puitlin mai theih a la ni lo a, a Room siamna tur hi kawng hrang hrang atangin ngaihtuah reng a ni,” a ti a, “Tunah hian School 100 chuang sak thatna tur Tender tichhuah a ni a, Teacher Quarters pawh CM Scheme atanga sak theih nan zawn a ni,” a ti bawk a. “Central lam atanga zirlai piah lam activity tam lutuk pawh Ministry lamah sawi a ni a, kan lo tih ve ngailo ang chi te inhrilhhriat zel niin, a tlem chho zel niin a lang,” a ti a. School calendar thlak avangin harsat tenau deuh kan tawk ngeiin a rinawm tih pawh Minister chuan sawiin, thil tha zawk nei tur chuan harsatna tawrh a ngai fo thin tih sawiin, tuar hram hram turin a fuih bawk.
Mizoram Teacher Eligibility Test (MTET) chungchang pawh School Education Minister chuan sawiin, kum 2028 hma a kum 5 aia tam service la nei ten MTET an neih vek theih nan tunah hian MBSE in ruahmanna a siam mek a, in-service tana tehna pawh tihhniam tum a ni tih a sawi a, Test pawh kum khatah vawi hnih (2) buatsaih tum a nih thu sawiin, “Kan tlin vek theih dan kan ngaihtuah a ni,” a ti bawk.
He hunah hian School Education Director Angela Zothanpuii pawhin MPTA te chu dawr nuam tak an nih thu leh India ram pum ang pawha PM POSHAN-a a ti tha pawl an nih theihna chhan chu zirtirtute thawhrah a nih thu a sawi a. Zirlai, a bik takin Primary zirlai rualte ngaihsan leh entawn ber chu an zirtirtute an nih avangin ruihhlo, zuk leh hmuam leh nungchangah pawh zirlaite entawn tlaka nung turin a chah bawk.
MPTA General Conference hian Resolution pahnih pass-in ‘Hindi hi National Language a nih anga Primary School atanga naupang ten an zir theih nan sawrkarah thlen ni rawh se’ an tih bakah ‘Primary School zawng zawngah Computer Set kan neih vek theih nan sawrkar ah thlen ni rawh se’ an ti a ni.