Serchhip District-a HIV/AIDS dinhmun thlirin hmalak zul zelna turte sawiho nghal a ni
He thutkhawm Serchhip DC Meeting Hall-a neih ah hian Dr. Zodinpuii Hrahsel chuan Mobilization for AIDS Suraksha Campaign chungchang sawifiahin, National AIDS Control Organisation (NACO) in December ni 1, 2026 hmaa 95-95-95 target ti hlawhtling tura a ruahman chungchang a sawi a. 95-95-95 awmzia chu Target population atanga 95% ten an dinhmun an inhriat a, chung zinga 95% ten ART hmanga enkawlna an dawn a, 95% ten inenkawlna hmanga taksaa HIV hrikte an thunun tihna a ni a. Tun dinhmunah (October Report) Serchhip District dinhmun chu 95-95-95 goal-ah, 83.5-97-96 a ni a, a hmasa ber tih loh ah chuan tinzawn hi tih hlawhtlin a ni tawh a, Serchhip District chu tunah hian Saksham Level-ah a awm mek a, HIV+ 943 an awm mek a ni.
Thutkhawm hmasa leh tun inkara an hmalakna hrang hrangte thlirho a ni a, Govt. Serchhip College-ah Red Ribbon Club te nen tangkawpin October ni 15 khan Awareness leh Screening neih niin zirlai 91 te thisen enfiah a ni a, HIV positive an awm lo a. District Hospital OPD-ah September ni 7 atanga October ni 12 chhung khan thisen enfiah leh ni bawkin mi 376 te test an ni a, October ni 19 khan HIV positive pakhat hmuhchhuah a ni. Heng bakah hian damdawi In-a damlo admit-te pawh HIV test thin an ni a, Mobile ICTC hmangin High Risk khua-ah HIV test neih thin a ni bawk. April atanga September chhung khan Serchhip District-ah HIV positive mi 22 hmuhchhuah thar an ni bawk a. Jail chhungah te, High Risk ho punkhawmna hmunah te, Truck hubs leh Migrant Labour awmkhawmna hmunah te Awareness Programme neih thin niin Jail hi thla tin tlawh thin a ni bawk.
Intensified IEC Campaign 3.0 chu September ni 7 atanga October ni 20 chhung khan kalpui niin October ni 20 thleng khan khaw 25 tuam a ni tawh a. He Campaign chhung hian mi 225 te thisen test niin HIV positive hmuhchhuah an awm lo a, Syphilis pakhat hmuhchhuah a ni thung.
Heng bakah hian hmalak zel dan turte rel niin, N. Vanlaiphai, Khawlailung, E. Lungdar leh Chhiahtlang khuaah te House-to-House HIV & Syphilis Screening neih te, Truckers, Taxi, Auto Rickshaw leh Sumo driver te hnena HIV & STI screening neih te leh High Risk Group ho hnena zan lama chhuaka HIV leh Syphilis test service pek chhunzawm te rel a ni a. Thutkhawm kaihruaitu Bawrhsap Paul L. Khuma chuan thawktute chungah lawmthu sawiin, concerned department ten thawhhona tha vawng zel tur te, Documentation leh Action Taken Report te mumal taka siam chhunzawm zel nise a ti bawk.