Zemabawk Middle School House Site Plan-a chhungkaw 96 te pass pechhuak
Zemabawk Middle School Veng House Site Plan huamchhunga ram neitu mi 96-te hnenah Land Revenue & Settlement Department changtu Minister B. Lalchhanzova chuan niminpiah khan Ram lehkha/Record of Rights (ROR) a hlan.
Hemi puala inkhawm Zemabawk West Local Council House-a neih ah LR&S Department changtu Minister B. Lalchhanzova chuan Zemabawk Middle School Veng House-Site Plan felfai taka peih a ni ta chu lawmawm a tih thu a sawi a. Chulai hmun chu tunhma lamin ‘Risk Mual’ tih hiala lo hriat tawh thin mah nise, Vengchhung mipui leh khawtlang hruaitute bakah Sawrkara thawktute inpekna leh helai ramin a kaihhnawih zawng zawngte tanrualna avanga tihfelfai theih a ni ta chu chhuanawm tak a ni tih a sawi a. Ram neitu ten thlamuang taka mahni ram an luah thei tawh turte, mahni hmun leh hma theuhte a neitu nihna dik tak an chelh thei tawh turte chu ram neitute tan pawha hriatreng tawh tur a ni tih sawiin, mipuite harsatna chinfelpui te, an lung-ngaihna te lo ngaihthlaksak leh an rawngbawl sak chu Sawrkar ngaihpawimawh ber a nih thu a sawi a. He huna kalkhawm te chu mahni hmunhma leh In leh lote chu theihtawp chhuaha enkawl zel tura fuihin, thenawm tha tak nih tum zel tur leh khawtlang nuam siam kawngah te theitawp chhuah turin a chah bawk a ni.He hunah hian Bialtu MLA leh Minister Lalthan-sanga pawhin ram neitu kalkhawmte chu a lawmpui tak zet thu sawiin, Sawrkar chuan mipuite buaina chingfel tur chuan theitawp a chhuah zel dawn tih a sawi a. An harsatna apiang chu ngampa taka thlen zel tura chahin, a theih chin chinah Bialtu a nihna ang pawha theihtawp chhuahpui zel a tum tih a sawi bawk.
Ram Lehkha inhlannaah hian Ram neitute bakah LR&S Department hotute, Local Council hruaitute leh Bialtu Corporator-te bakah thuthar lakhawmtute an tel a. Inhlanna hun hi Vanlalmawia, Secretary, LR&S Department chuan kaihruaiin R. Lalthazuala, Director LR&S chuan Ram Lehkha chin fel nana hmalakdan tlangpui a sawifiah a. Hemi zawh hian Local Council, Bialtu Corporator leh LSC Demand Committee te chuan thu sawiin, Ram Lehkha inhlanna hun hman chhunzawm a ni.