Mizoram Larsap hovin Pachhunga University College-ah 5th Cultural Day hman a ni
PUC College Cultural Day-ah hian Larsap General (Dr) Vijay Kumar Singh chuan Cultural Day chu mahni nihna hriatchianna leh chhuang taka lantirna hun a ni tih sawiin, “Hnam ziarang leh nunphung hi hnam leh khawtlang min phuar khawm tlattu a ni a, thangthar ten an hriatthiama, an ngaihhluta an chhawmnung chauhin a dai lo ang,” a ti a. Mizo hnam ziarang leh nunphung chu Tlawmngaihna, midang chunga thatna, huaisenna, aia upa zah leh khawtlang inlungrualnaah a hausa hle tih sawiin, thalaite chu Mizoram ralmuanna, ziak leh chhiar thiam tamna bakah hnam ziarang leh leilung pianken hausa takte veng thaa tangkai taka hmang turin a chah a. India ramin tunlai thiamna leh thil thar thlen kawngah hmasawnna chak taka a kalpui thu sawiin, mahni hnam tobul hloh chuang lova hmalam pan chu hmasawnna awmze nei a nih thu a sawi a. Thalaite chu zirna, tunlai khawvel thiamna leh remchanna chhawr tangkai chung zela mahni hnam ziarang leh nunphung hluta vawnghim tlat turin a fuih a ni.
He hunah hian Higher Technical Education Minister Dr. Vanlalthlana pawhin hnam ziarang vawnghima nunpui tlat chu mihring ropui chherchhuah nana pawimawh a nih bakah zirna In inghahna nghet siam nana pawimawh a nih thu a sawi a. Silhfen inbel hmang ringawta hnam ziarang pholan a tawk lo tih sawiin, thalaite chu Aia upa zahna leh Tlawmngaihna te chu hnam incheina an hak rualin an thinlungah vawng tel turin a chah a. An kalna apiangah Mizo hnam ziarang leh nunphung zahpui lova midangte hmuh theiha pholangtu nih tum turin a fuih bawk.
P&E Minister F. Rodingliana pawhin thalaite nena Cultural Day hman chu nuam a tih thu sawiin, “Mizo hnam ziarang leh nunphung hi kan chhawmnun zel a pawimawh a, kan danglam bikna, chhiatni thatnia kan intawiawm thinnate hi kan thlahthlam tur a ni lo,” a ti. Thiamna leh finna zawn rualin chhungkaw din pawh ngaih pawimawh tel a tul thu sawi bawkin thalaite chu ngaihtuahna dik neia ngaihsan tur dik tak ngaihsan nachang hre turin a chah bawk a ni.
PUC Cultural Day-ah hian Mizoram University Vice Chancellor, Prof. Dibakar Chandra Deka chuan kalkhawmte lawmna thu sawiin, Laisuih Award 2026 chu ‘RINI Speech AI’ duang chhuaktu leh PUC chhuak Zoramthanga hnenah hlan niin a aiawhin a nupui Dr. Maria Sailo in Larsap kut atangin a dawng a. Kalkhawm ten tharum thawhnaa inhnamhnawih lo tura intiamna an sawirual bakah Prof. H. Lalthanzara, Principal, PUC-in Souvenir a tlangzarh bawk a ni.
Pachhunga University College hi Mizoram University hnuaia College peng pakhat niin NAAC Accredited 'A+' Grade leh NIRF 2025 hnuaia 49-na dinhmun luah mek a, Cultural Day-ah hian Hnam Lam leh zai, Rimawi, Drama, Cosplay, India ram chhung leh pawn hnam thuam pholanna hun te hman a ni.