Tripura atanga Mizoram-a Gas Pipeline phum hna thawh mek Supply Minister in a tlawh

Northeast Gas Grid Project kaltlanga Indradhanush Gas Grid Limited hmalakna a KM 119.450-a thui Panisagar (Tripura) – Aizawl (Mizoram) Gas Pipeline siam hna thawh mek chu nimin khan Supply Minister B. Lalchhanzova chuan a hmunah kalin hnathawh dan a enfiah.
Supply Minister hian he hna thawh mekna hmun Mamit District-a Tuidam khua chu tlawhin khawvel ram hrang hranga buaina thlengin a nghawng zingah eirawngbawlna LPG ngei pawh heng avang hian hun engemaw chen chu Mizoram in harsatna a hmachhawn phah thu a sawi a. Hemi avang hian Inchhung eirawngbawlna chu Gas Pipe Connection-a thlunzawm a nih theih nan Northeast Gas Grid Project hnuaiah India hmarchhak State hrang hrangin Gas Pipeline Connection an neih theih nan cheng vbc. 9265 bawr vel sengin Gas pipe KM 1656-a thui phum hna thawh mek a nih thu a sawi a. Mizoram pawh Tripura Natural Gas Company Limited nen thlunzawm turin IGGL ten hma an lak mek thu sawiin, he ruahmanna hi Mamit District leh Aizawl District-a kalpui hmasak tur niin March - April, 2027 chhungin Mamit khawpui a luh hman beisei a nih thu a sawi a. Aizawl, Sihhmui pawh March -April 2028 hmaa thlunzawm hman beisei a nih thu a sawi bawk.

Minister B. Lalchhanzova chuan Mizoram chu Gas pipeline hmanga thlunzawm a nih chuan ram danga kan hmuh thin, CNG hmanga lirtheite tlan tir theih a nih tur thu a sawi a. Hei hian tuialhthei mamawhna nasa takin a tihhniam a beisei thu a sawi bakah LPG mamawh ang tawk hmuh loh avanga eirawngbawlna kawnga harsatna awm thin chu Gas pipeline connection hian a sutkian a beisei thu a sawi a. A rang thei ang bera Mizoram mipuiin gas pipeline connection an hman ve theih nan IGGL hotute chu tan la turin a chah bawk a ni.

Supply Minister hian Tuidam khaw pawhna kawng avanga harsatna awm chu a hmunah a endik a. Gas pipeline phumna tur kawng KM 1.5 vela thui chu hmun engemaw zat ah zauh belh a tul thu sawi niin, he kawng thawmthatna tura ruahmanna awmsa nen a insut buai loh nan IGGL leh PWD lam hotute chuan thawhho dan tur an sawi nghal bawk a ni.

Northeast Gas Grid Project kaltlanga Indradhanush Gas Grid Limited hmalakna hnuaiah hian Tripura Natural Gas Company Limited (TNGCL) leh Aizawl khawpui chu Gas pipeline a thunzawm tur niin Pasinagar (Tripura) – Aizawl (Mizoram) inkar KM 119.450-ah hian Gas pipeline 12 inches diameter a lian, 7.14 mm a chhah phum tur niin Sectionalizing Valve Station 6, Dispatch Terminal pakhat leh Receiving Terminal pakhat a awm dawn a ni. Pipeline hi Tripura State chhunga khaw 6 paltlangin KM 15.105-a thui a awm anga, Mizoram chhunga khaw 20 paltlangin KM 104.345-a awm bawk ang. Pasinagar – Aizawl pipeline thlunzawm hna hi IGGL hnuaiah M/s Cortech International Limited-ten an thawk a, he Project thawh nan hian Northeast Gas Grid Project hnuaiah cheng vbc. 491 ruahman a ni.