Thangthar lo awm zel turte tan hian zirna tha zawk neih kan tum - Chief Minister
Serchhip Bialtu MLA leh Chief Minister Lalduhoma chuan nimin khan Serchhip-a Little Flower Convent School (LFCS) ten an kum 50 tlinna, Golden Jubilee an lawmna hun chu khuallian nia hmanpuiin he hunah hian zirna an ngaih pawimawh thu a sawi a, Chief Minister chuan Zirtirtu pawh engemaw zat lak thar an nih bakah, hmun hrang hrangah zirna In tih changtlun mek zel a nih thu te, Zirtirtute Quarters sak mek a nih thu te, zirna sang zawkte pawh ngaih pawimawh niin NIT Mizoram harsatna pawh chinfelsak an nih tawh thute a sawi a. “Mizoram Engineering College pawh a taka kaltir tumin thapui kan thawh mek a, Mizoram State University pawh kan bawhzui zel a, thangthar lo awm zel turte tan hian zirna tha zawk neih kan tum a ni,” a ti.
LFCS Golden Jubilee lawmnaa a tel thei chu lawmawm a tih thu Chief Minister chuan sawiin, kum 50 hmel a hmuh theih nana LFCS chhungkua zawng zawngte thawhrimna leh inpeknaah lawmthu a sawi a. Kum 1976-a din a nih tirha zirlai 18 chauh nei, tunah zirlai 1007 leh Zirtirtu 33 nei mek, he School hian sawrkar Officer, Doctor, Engineer leh eizawnna hrang hranga mi hlawhtling tak tak a chherchhuah tawh thu sawiin, chhuanawm a tih thu a sawi a. LFCS chu 'Serchhip chanchin nena inzawm tlat, khawtlang nun kaihruaitu leh chhertu pawimawh tak a ni' tiin hun lo awm leh zel turah pawh an thupui 'In Thy Light We Shall See Light' tih chu vawng nung zel a, naupangte nun kawng kawhhmuhtu leh kaihruaitu, eng mawi tak ni zel turin duhsakna a hlan nghal bawk a ni.
Nimin-a LFCS Golden Jubilee lawmna hun hi an School Complex-ah neih niin School Headmistress Sister Wilma chuan inlawmna thu a sawi a, Serchhip District Bawrhsap Paul L. Khuma; Rev. Sr. Milly Fernandes, Ursuline Franciscan Educational Society leh Vicar General Rev. Fr. Joseph Lalbiakthanga te'n thu an sawi bakah Zirlai naupangte'n zai leh lam bakah, hnam lam, rimawi tum leh hmuhnawm chi hrang hrangte an entir bawk a. Khualzahawm Most Rev. Joachim Waldera'n malsawm tawngtaina hmangin LFCS Golden Jubilee lawmna hun hi a khar a ni.
Serchhip-a School hlun ber te zinga mi Little Flower Convent School hi February 2, 1976-ah din a ni a, a thupui chu 'In Thy Light We Shall See Light' a ni a. A tirah zirlai 18 chauh awmin, Catholic Kohhran in kum 14 a enkawl hnuah kum 1990-ah Mizoram Sawrkar-in Zirtirtu 6 leh Staff pakhat te Deficit Pay Scale-in a rawih sak tan a. SSA hnuaiah tihchangtlun chhunzawm zel niin, tunah Zirtirtu 10-ah tihpunsak an ni tawh a ni.