Sawrkar sum enkawlna tur thil thar tlangzarh a ni

Mizoram sawrkar sum enkawlna lama kalphung thar pali (Digital Financial Management kalphung thar) Mizoram Integrated Works Accounts System (MIWAS), e-Budget Module, e-Sanction Module leh 100% Direct Benefit Transfer te chu nimin khan Chief Minister leh Finance changtu Lalduhoma chuan a tlangzarh.
Chief Minister Pisa-a heng thil pali tlangzarhna hunah hian Chief Minister chuan Department thenkhatin sawrkar kum tawpa SNA SPARSH an dah zero theih loh avangin sum tam tak a lapse tawh tih sawiin, “Tunhnaiah Department thenkhatin a hun taka UC an thehluh theih loh avangin SASCI Fund approval kan hmu leh mai thei lo bawk a. Tun hnuah chuan Administrative Approval an hmuh atanga thla thum (3) chhungin Tender an tichhuak thei vek tawh tur a ni tih hi sawrkar duhdan a ni,” a ti a. Sawrkar sum enkawlna kawngah langtlang, thianghlim leh dik kan mamawh tih sawiin, “Kum kalta khan Mizoram-in SASCI Part IX hnuaiah incentive cheng vbc. 350 kan dawng a, 2026-27 chhung hian SASCI Part IV leh Part IX hnuaiah cheng vbc. 650 vel hmuh leh kan beisei a ni.” a ti bawk.

Nimin-a tlangzarh tak Mizoram Integrated Works Accounts System (MIWAS) hian Department paruk - Public Works Department (PWD), Public Health Engineering Department (PHE), Power & Electricity Department (P&E), Irrigation & Water Resources Department (IWRD), Environment, Forest & Climate Change Department (EFCC) leh Land Resources, Soil & Water Conservation Department (LRS&WC) hnuaia Works Accounts-te felfai zawkin a enkawl dawn a. Accountant General hnena sum hman dan leh Treasury kaltlanga Expenditure voucher thehluhna kawngah a pui dawn a, Cheque System nuai bona tur a ni.

Nimin-a tlangzarh e-Budget Module hmang hian IFMIS kaltlangin online-a budget proposal buatsaih leh thehluh theih a ni dawn a, kut-a thawh ngai, chhut sual awm thei leh thehlut tlai awm thinte a titlem ang.

Hei bakah hian e-Sanction Module hmang hian sum hman phalna (expenditure sanction) online-a buaipui theih a ni tawh anga. Drawing and Disbursing Officer leh Head of Department atangin Administrative Department leh Finance Department hnenah electronic hmanga a thawn theih tawh dawn avangin hei hian budget-a sum awm bak hman palh tur thlengin a veng dawn a ni. Sawrkar laipui duh dana 100% Direct Benefit Transfer System (100% DBT) hnuaiah hian State scheme hrang hrang - Thlai Thar Leina, Bana Kaih leh Power Subsidy hnuaia sum pek turte chu Treasury-in bill a pass hnuah beneficiary-te Bank Account-ah direct-in thawn nghal a ni tawh dawn a. IFMIS kaltlangin a payment status pawh chhui zui theih a ni tawh dawn bawk a ni.