Sawrkar kum kal mekah Chhiah vbc. 701.12 hmuh a ni tawh

Mizoram sawrkar Taxation Department chuan sawrkar kum kal mek 2026-27 April atanga September thla thlengin chhiah cheng vbc. 701.12 chuang a hmu tawh a, kawng siamna leh enkawlna tura Petrol leh Diesel atanga chhiah lakna, Road Maintenance Cess atangin Rs. 26,92,31,001 hmuh a ni tawh bawk.
Taxation Department chhinchhiah danin sawrkar kum kal mek thla ruk (6) chhunga Chhiah hmuh ah hian Goods and Services Tax (GST) atanga hmuh tam berin cheng vbc 491.69 hmuh a ni a, a dawttu Sales Tax atangin cheng vbc 149.01 hmuh a ni tawh a; heng bakah hian kawngpui siam leh enkawlna tura lak thin Road Maintenance Cess leh mipui tana chhawm-dawlna hna thawhna tur, Social Infrastructure & Services Cess atangin cheng vbc. 26.92 ve ve hmuh a ni tawh bawk a. Profession Tax atangin cheng vbc. 6.56 leh chhiah lakna dang dang atangin cheng nuai 1.32 hmuh a ni bawk a; thla 6 chhunga chhiah hmuh zawng zawng hi a vaiin cheng vbc. 701.12 a tling tawh a ni.

Kumin thla ruk kalta chhunga chhiah lakluh tam ber thla chu April 2026 kha niin cheng vbc. 209.30 hmuh a ni a; chhiah hmuh tlem ber thla chu thla liamta September kha a ni a, cheng vbc 77.82 hmuh a ni.

Taxation Department-in an tarlan danin, Road Maintenance Cess atangin thla 6 chhungin Rs. 26,92,31,001 hmuh a ni a, hemi atana chhiah hmuh tam ber thla kumin April thla khan cheng nuai 1,251 hmuh niin July thlaa hmuh cheng nuai 1,098 in a dawt a. Thla 6 chhunga Road Maintenance Cess-a chhiah hmuh tlem ber thla chu kumin June kha niin, cheng nuai 63 hmuh a ni a; April leh July thla te hi Cess luh tam zual lai niin he thla hnih ringawt atang hian cheng nuai 2,350 chuang a lut a, thla dangah erawh cheng nuai 100 vel leh a hnuai lam a lut thung.