Presbytery Inkhawmpui nei

Mizoram Synod hnuaia Inkhawmpui lian ber dawttu, Presbytery Inkhawmpui chu nizan atang khan Presbytery hrang hrangah neih tan a ni a, naktuk Pathianni zan thleng a awh ang.
Kumin a Presbytery Inkhawmpui-ah hian nimin lamah Nomination Committee, Finance Committee leh Sub-Pastoral Committee he thuin, Kohhran Upa thlan tharte Exam buatsaih a ni bawk a, nizan inkhawmah Palai lawmna leh Pastor Bial Report ngaihthlak niin Vawiin hian Rorel Inkhawm an nei anga, zanin atangin Vantlang Pathian biak Inkhawm neiin naktuk chawhma lamah Upa Nemngheh Inkhawm leh chawhnu-ah Lalpa Zanriah Sakramen leh Upa thi te sunna inkhawm a awm ang a, zanah Presbytery Moderator kalchhuak ten Valedictory Sermon an sawi ang.

Mizoram Synod hnuaiah hian Presbytery 48 awmin Chhimchhak Presbytery Inkhawmpui vawi 103-an pawh Serchhip Chhim Veng Kohhran Biak In-ah neih mek a ni a, Thlarau lam thupui atan ‘Pathian hnaih’ tih hman niin Serchhip Town chhunga Pastor Bial 5 te a huam a ni.