Sawrkar in MSU tana ram a pek ah MSU Building sakna tur lungphum Chief Minister in a phum
Lungphum phumna puala hun hman ah Chief Minister Lalduhoma chuan, kan ram leh hnam tana pawl pawimawh leh lian, kan hnam kal zelna tura pawimawh zui zel tur kan nei tih sawiin, “Chung zinga pawl tam zawk chuan mahni puala hmunhma neiin Office-te pawh an nei tawh a. An zinga hmunhma leh Office la nei ve lo chu MSU te hi an ni. Heng pawl pawimawhte hi ngelnghet takin awm se tih hi kan thinlungah a awm a. MHIP Office building thar tur kan sa mek a, MUP Office kan sak zawm mek a, YMA tan Thingsulthliah-ah Convention Centre lian tak kan sa mek bawk,” a ti a. “Ainawn Veng hi tunhmaa sawrkarin sawrkar hmunhma atana tha taka a duan a ni a, a sulsutu chu Chief Minister Brig T. Sailo kha a ni a. Ruahmanna fel tak nen a bul tan mah se a hnu lamah mumal taka kalpui zui a ni ta lova. Kan sawrkar hnuah Ainawn Veng-a sawrkar ramte hi a theih ang angin kan sing sa a. Chumi kan kalpuina lamah chuan kan tlawmngai pawl pawimawh zinga ram nei lo MSU tan he lai hmun hi kan pe ta a ni,” a ti a. An mamawh chu Office a nih avangin Office sakna tur sum hi ruahmanna an siam sak zui zel tih Chief Minister chuan sawiin, “Chuvang chuan Vawii-nah a lung kan lo phum thei ta a ni. Hun rei tak mahni a hmunhma leh Office nei lo MSU te ka lawmpui em em a ni,” a ti a. “Building tha tak leh mawi tak sak kan tum dawn nia,” a ti bawk.
He hunah hian MSU President B. Lalkhawngaihzuala pawhin MSU hian Office hmun tur ram an nei lo tih sawiin, “Mahni pualin Office kan nei lova. Tunhma atang tawhin kan theih ang angin kan dap thin a. Kumin kumtir lamah khan Revenue Minister hnenah beiseina thar nen dilna kan thehlut leh ta a, kan Chief Minister hnenah kan thlen bawk a. Kan Chief Minister zarah MSU chuan kum rei tak kan lo beisei tawh ram chu Ainawn Veng-ah kan nei ta a ni,” a ti a. “Ram ringawt kha kan mamawh a ni lova, building kha kan mamawh a ni si a. Chu pawh chu Chief Minister puihnain Vawiin-ah a lung kan lo phum thei ta a. Kan lawm em em a, MSU chuan engtik ah mah Chief Minister Pu Lalduhoma hi kan theihnghilh thei tawh ngai dawn lo a ni,” a ti bawk.
Nimin-a hun hman hi MSU General Secretary Zodinsanga chuan kaihruaiin MUP leh MHIP General Headquarters hruaitute pawhin thu an sawi bawk a ni.