Remsiami hovin India Champion
Asia khawmualpui-a ram hrang hrangte infiamna lama an inelna, Asian Games 2026 hi Japan-a Aichi Prefecture leh Nagoya-ah neih mek niin India in Medal lak a beiseina Hmeichhe Hockey-ah nimin tlai khan India chuan Gold Medal a hlawhchhuak a, he inelna a Final hi nimin tlai khan India leh China te chuan khelin India hian si khat faiin hnehna an chang a, he inkhel a goal awmchhun hi minute 10-na lekah Mizo nula Lalremsiami Hmarzote chuan a khung a ni.
He inkhel a India in an hmachhawn China hi Champion lai an nih mai bakah Olympic Games-a Silver Medal latu an ni a, tun tumah pawh hian Champion tura rinkai zinga mi niin India Team-ah hian Lalremsiami bakah Mizo nula Lalthantluangi a tel bawk a ni. India hian he inkhel a hnehna an chan avang hian Asian Games-ah Gold Medal an lak bakah kum 1982 hnu, kum 44 hnuah Hockey-ah Gola Medal an la leh ta chiah a, hei mai bakah hian kum 2028-a Los Angeles-a Olympic neih tura tel turin an tling ta nghal bawk a ni.
Kum 1998 leh 2018-a Silver Medal hlawhchhuaktu India Team hian kumin chuan Gold Medal an lo hawn ta a. Inkhelh chhung zawngin Remsiami Zote hming lamrik a ni a, ani hian India tan game 200 a khel tling chiah a, chakna goal a khung bawk a ni. Siami mai bakah Thantluangi pawh India Team-ah hian a tel ve a, Mizoram-ah Gold pahnih an rawn hawn dawn a ni.
Kumin Asian Games-a Hmeichhe Hockey inelna ah hian India hi a chetha hle a, hneh loh nei lova Champion in India tan Lalremsiami hi a chetha hle bawk a. India hi Pool B-ah awmin Pool match vawi 5 an khelh ah chak vekin Goal 66 an khung laiin goal 3 chiah an chhuah a. Uzbekistan lakah 19-0 a chakin Siami hian goal khat a khung bakah Tantluangi chuan goal hnih a khung a. Indonesia chu 17-a a hneh lehin Siami hian goal hnih a khung leh a. Thailand chu 20-1 a hneh lehin Siami hian goal khat a khung leh a, India laka 3-1 a an chak tumin Siami hian goal khat a khung leh a, Singapore laka 7-0 a an chak tumin goal khat a khung leh bawk.
Semi Final-ah India hian South Korea chu 2-0 a hnehin Final-ah China chu si khat faia hnehin Siami hian chakna goal khungin Gold an la a, China in Silver lain Bronze Medal inchuh ah Japan leh South Korea te 0-0 a inhnehtawkin penalty-ah Japan hi 4-2 in an chak a ni.