Random Examination 2025 Report Card leh MBSE Mobile App pahnih tlangzarh a ni
MBSE Conference Hall, Aizawl-a heng thil te tlangzarhna hunah hian School Education Minister, Dr. Vanlalthlana chuan kan ram zirna ah hian Subject hrang hrangah rampum huap chawhrual, National Average kan la pha lo tih sawiin, hei hi pha turin Random Examination leh Common Question-te hian min puih theih beisei a ni tih a sawi a. Random Examination 2025-ah zaa 65-in an pass thei chu lawmawm a tih thu sawiin, SCERT-in Standardized Assessment for Elementary Schools (SAfES) a kalpui bawk a, heng hian kan zirchhuah a tihsan beisei a nih thu a sawi bawk.
Minister chuan zirlaiten a bulthut an thiam loh chuan Entrance hrang hrangah kan dinhmun a sang thei lo tih sawiin, zirna siamthat nan Question design a that a ngai a, Random Examination leh Common Question-te hian min puih theih beisei a ni tih a sawi a. School thenkhatin Class IX Syllabus zirtir kim lovin, zirlaiten a bul thut an man loh phah thu leh an kal zelnaah harsatna an tawk tih sawiin, Zirtirtute chu a kim thei ang bera zirtir turin a ngen a. Zirna kalphung remfel zel a ni dawn tih sawiin, “Hei hian Zirtirtute leh zirlaite a nawr dawn a, hma kan sawnpui ngei kan beisei,” a ti bawk.
Zirlaite tana ‘Random Examination 2025’ buatsaih ah hian kan State dinhmun hriat nan Class 3,6 leh 9-ah te Mizoram chhunga District tinah Random Examination hi buatsaih a ni a, School 232-a zirlai 8,856 ten exam an hmachhawn a. Random Exam-ah hian Subject 5- English, Mizo, Mathematics, Science leh Social Science-ah te zawhna siam a ni a, Subject tinin Mark 20 zel a pu a, MCQ hmanga exam a ni a. Mi 5,778 ten mark zaa 40 an hmu a, pass-a puan an ni a, zaa 65.24 an pass a ni.
Confidential Material Tracking and Monitoring System (MBSE-CTMS) hi Board Exam Centre Superintendent-ten Exam thil pawimawh chi hrang hrang vawn that, chhui leh report nan hman a ni dawn a, School Report System (MBSE-SRS) chu Exam chungchanga Board leh School-te indawr tawnna tura ruahman a ni.
Nimin-a he hun hman hi MBSE Chairman JH. Zoremthanga chuan kaihruaiin MBSE Secretary Sarah Lalengzami Pachuau leh Deputy Secretary Lalrinmawia Ralte te chuan heng thil tlangzarh te hi an sawifiah bawk a ni.