Rampum-ah Vigilance Awareness Week hman a ni
‘Integrity Pledge’ hi Aizawl-ah chuan Mizoram Secretariat a thawk Officer leh Staff te chuan Secretariat Building No.1 kawtah Chief Secretary mawhphurhna la tu Sudhir Kumar IAS, Principal Secretary, General Administration Department kaihhruainain chamrual a ni a, Mizoram puma sawrkar Office tina thawktuten he thutiam hi an la a ni.
Central Vigilance Commission bultumin India ramah kum 2000 atang khan ‘Vigilance Awareness Week’ hi kumtin hman tan a ni a. India ram tana mi ropui, India rama Deputy Prime Minister leh Home Minister hmasa ber Sardar Vallabhai Patel piancham October 31 chhung khungin, 2000 atang khan Vigilance Awareness Week hi October kar tawp atanga November kar tir chhungin kumtin hman thin a ni. Sardar Vallabhai Patel hi Modern All India Services dinchuaktu-ah ngaih niin Patron Saint of India’s Civil Servants tiin an ko hial a. Amah hi mi invawng tak, mi rinawm leh nghet tlat, thil dik leh tha atana dawl mai mai lo a ni a. India ram leh hnam a hmangaihnaah te, a rinawmnaah te, rorelna dik a veina leh a kenkawh kawngah te entawn tlak leh chawimawi a ni a. Hei vang hian Vigilance Awareness Week hi a piancham chhungkhunga hman a ni.
Vigilance Awareness Week hi kum 2000 khan hman tan niin hemi hnu hian thupui hrang hrang neiin hman thin a ni a, kumin hian ‘Probity for Prosperity’ – Hmasawnna leh hnianghnarna tobul chu dikna leh rinawmna a ni tih chu thupui-ah hmangin Mizoram sawrkar Vigilance Department pawhin he Hapta atan hian hmachhawp hrang hrang a siam a. Programme pui ber chu Vanapa Hall-ah October ni 28, 2026 khian Workshop buatsaih tum niin Chief Minister Lalduhoma’n a hmanpui dawn a. He hunah hian a tel zawng zawng ten Central Vigilance Commission in a duan chhuah Rinawmna thuthiam/Integrity Pledge lak ho tur niin hei bakah hian sawrkar hnathawk zawng zawng tan Online a Integrity Pledge la vek tura hriattirna chu sawrkar in a chhuah tawh a ni.
Hei bakah hian Awareness Gram Sabha chu October 31, 2026 ah buatsaih turin RD&AD chu ngen an ni tawh a, Vigilance Department chuan he Vigilance Awareness Week, 2026 pualin ‘Probity for Prosperity’ tih thupui hmangin Flyer Making Competition chu a duh apiang tel theihna a buatsaih a. Walkathon chu Vanapa Hall atanga Millennium Centre thleng nei turin ruahmanna a siam bawk a. He Walkathon hi Chief Minister Lalduhawma chuan a vailiam dawn a ni.