Rampum-ah ‘National Postal Week’ hman mek a ni
Ministry of Communications hnuaia Department of Posts (DoP) chuan kar kalta Zirtawpni a World Post Day lawmna pualin tunkar Ningani thleng khian rampum huapin National Postal Week lawmna hun a buatsaih a, Akashvani News Aizawl zawhna chhangin Postal Department, Mizoram Division-a Marketing Executive HS. Lalnghakliana chuan Mizoram pawh National Postal Week atan hian kawng hrang hrangin a inbuatsaih tih sawiin, nimin khan Aizawl Head Post Office bakah Mizoram-a Sub-Division hrang hrang te chuan zirlaite tan Quiz leh ‘A Letter to Mother Earth: My Promise to Protect Nature’ tih thupui hmanga Letter Writing inelna an buatsaih tih a sawi a. Vawiin hian Post Office Saving Account hawn runpui kalpui a nih dawn bakah Postal Life Insurance (PLI) leh Rural Postal Life Insurance (RPLI) te chu Aizawl Head Post Office bakah Sub-Office hrang hrang leh DO-ah te huaihawt a ni dawn tih a sawi a. Naktuk Nilaini-ah Business Meet buatsaihin, an customer lian zualte nen inkawm hona a awm ang a, naktip Ningani-ah Post Office-a thawkte leh anmahni dawr thintute tan Technology Quiz buatsaih a ni dawn tih a sawi bawk.
Post Office Savings Account hi sawrkar laipui thlawpna hnuaiah India Post-a Bank Account hawn theihna a ni a, pawisa dah tlem ber theih zat, mMnimum balance chu Rs. 500 niin, kum khatah zaa 4-in a pung a ni. Postal Life Insurance (PLI) leh Rural PLI te hi sawrkar laipui thlawpna hnuaia Department of Post-in sawrkar hnathawk, sipaite leh thingtlanga chengte tana man tlawm zawka Life insurance tih theihna tur a siam a ni a, he Life Insurance hnuaiah hian hamthatna hrang hrang a dawn theih a ni.