Rain International Nature Film Festival hmanpui
Nimin-a Rain International Nature Film Festival-ah hian IPRP&S Minister B. Lalchhanzova chuan sik leh sa, thing leh mau, ramngaw hlutzia leh humhalh a tulzia inzirtirna lam hawi Film Festival buatsaihah Mizoram Film siamtute sawm an ni chu lawmawm a tih thu a sawiin, Mizoram aiawha tel Film siamtu ten Mizoram mawizia phochhuahna hun remchang atan leh hmasawnna tur ngaihtuahna thar puakchhuahna hun atan an hman tangkai a beisei thu a sawi a. Khawvel sik leh sa inher danglam danglam zelah kan ramngaw, thing leh mau leh ramsa te a chereu nasa a; he kan chenna khawvel hi a chhiat zel lohna turin thangtharte inzirtir kan mamawh a, film hi mi thinlunga thusawina hmanraw tha ber te zinga mi a nih angin Environmental Awareness atana film hman tangkai nachang hria Jayaraj Foundation chu Minister hian a fak a ni.
Mizoram leh Kerala chu inhlat taka awm ni mahse kan khawsak phung leh thil thlir dan, a bik takin zirna lamah te, rinna thuah te, khawtlanga inpumkhatna kan neih danah te inanna tam tak kan nei tih Minister chuan sawiin, Mizoram Filmmaker te nen Culture leh Film hmanga Kerala leh Mizoram mipuiten inkungkaihna tha zawk an neih ngei a beisei thu a sawi bawk.
Sik leh sa leh Environment lam hawi he Film Festival hi Keralam Film Maker lar leh National Film Awards-a Jury Chairman pawh lo ni tawh Jayaraj buatsaih niin SCMS School of Technology & Management hmunah neih a ni a, October ni 31 thleng a awh ang. He Film Festival hi United Nations Convention to Combat Desertification pawhin a hriatpui a; NFDC, Jayaraj Foundation, Kerala State Chalchitra Academy bakah pawl engemawzatin hriatpuiin an sponsor a ni.
8th Rain International Nature Film Festival-ah hian Mizoram chu Focus State a puan niin Mizoram atangin Film 4 chu Festival neih chhungin tihchhuah (screen) a ni dawn a. A hawnna programme Minister hoa neihah hian Bangalore Mizo Association (BMA) member mi 10 ten Mizo hnam lam an entir a, mipui lawm a hlawh hle bawk a. Mizoram aiawhin Pratap Chhetri, Jt Director I≺ Remlalliana Hnamte, PS to IPRP&S Minister bakah film maker pathum - Napoleon RZ Thanga, Lalruatfela leh K. Lalrinzuala te an tel a ni.