PWD Minister hovin hnathawh hrang hrang thlirletna neih a ni

Public Works Department-a Officer leh Engineer te chuan nimin khan PWD Engineer-in-Chief Conference Hall-ah PWD Minister, Vanlalhlana hovin PWD hnuaia hnathawh hrang hrang - thawh zawh tawh te, thawh mek te leh hmachhawp te thlirletna leh sawihona (review meeting) an nei a. He hunah hian PWD Minister chuan hna reng reng chu hunbi dik taka zawh tum zel tura chahin, Inthlahdah avanga tih khawtlai te chu thil zahthlak a nih thu leh hetiang lakah hian fihlim hram turin a chah a. Mipui sum hmanna kawngah mawhphurhna lian tak an nei tih sawiin thil siam thar emaw, thil siam sa enkawl hna emaw, engkim hi tha taka thawk zel turin a chah a ni. He hun hi PWD Commissioner & Secretary V. Lalsangliana chuan kaihruaiin an Department hnuaia hnathawh leh hmalakna hrang hrangte tarlangin, zawhna leh chhanna bakah sawihona te neih a ni bawk.