Mi 7,275 hnenah Chief Minister Special package pein mi 522 te Loan pek an ni tawh bawk
Nimin khan Aizawl-a Planning & Programme Implementation Department Conference Hall-ah Handholding Scheme Phase III kalpui meka Implementing Department, District Administration leh Partner Bank-te tan 'Workshop on Handholding Scheme' buatsaih a ni a, he huna tarlan a nih danin Mizoram Sawrkar flagship - Bana Kaih Scheme kaltlang hian Chief Minister Special package hnuaiah mi 7,275-te tanpuina pekchhuah ni tawhin hemi atana sum pekchhuah chu Rs. 33,51,03,870 a tling tawh a. Bana Kaih Scheme Loan Component kaltlangin Progress Partner tura thlan mi 522 te hnenah loan pekchhuah ni tawh bawkin sum pekchhuah chu Rs. 48,79,10,824 a tling tawh bawk a ni. Bana Kaih Scheme hnuaiah hian Scheme 15 rinluh a ni a. He Scheme hnuaia loan la te hi Sawrkarin a pung a rulh sak thin a, cheng vbc 1.123 a rulh sak tawhin Guarantor Fee cheng nuai 14 vel a pe tawh bawk.
Nimin-a Workshop-ah hian Adviser to Chief Minister (Implementation of Handholding Policy), Dr. KC. Lalmalsawmzauva chuan Sawrkar flagship Scheme Bana Kaih Scheme chu Mizoram in intodelhna kawng chak zawka a zawh theihna tura hmanraw tangkai a nih thu sawiin, kawng hrang hranga intodelhna tluantling siam tur chuan Bana Kaih Scheme Implementing Department a Nodal Officer-te an pawimawh tak zet thu a sawi a. Mi rintlak, Bana Kaih Scheme hmanga eizawnna ngelnghet nei tura thiamna leh theihna hmantlak neite chauh thlanchhuah a nih theih nan fimkhur tak leh uluk takin Nodal Officer-te chu hma la turin a chah a. Mahni ram atanga kan thil tharchhuah chu ngaihhlut a pawimawh thu pawh sawiin, Mizoram chhunga tharchhuah Hmunphiah te chu ramchhung ah ngei tangkai taka hman uar zel a tul thu a sawi a. October ni 3 atanga ni 8 chhung khan Vairengte Checkgate paltlanga Alu rawn lut zat chu cheng nuai 115 hu a nih thu sawiin, ei leh bara intodelh tura tanlak a tul thu a sawi bawk.
Chawhnu lamah hian Handholding Scheme kalpuina kawnga Bank leh Implementing Department-te inher rem ngai leh siamthat ngai awmte ngaithlak a ni bawk.