Operation Trident hlawhtlinna ah lawm
Central YMA hruaitute chu Home Minister K. Sapdanga pisa-ah lengin, Operation Trident hlawhtlin lawmna an nei a, he hunah hian Home Minister chuan Operation hlawhtlin lawmna Central YMA hruaitute nen an nei thei chu lawmawm a tih thu a sawi a, Operation Trident tia Ministry of Home Affairs-in beihpui a rawn thlak chu Mizoram tan a vanneihthlak takzet a, a inhmeh em em bawk, a ti a. He Operation hi a tawpna a ni dawn lo a, a bul tanna tur a nih thu sawiin, “He ruihhlo hnuk chhuchat tur hian YMA-ten beihpui an thlak chhunzawm zel ang,” a ti a, an hmalakna chu a chhuanawm ti zawnga ngaihtuah lo tura tiin, “Mizo thalaite nun engzat nge chhanchhuah? Ruihhlo laka la fihlim thalai engzatnge an venhim? Chhungkaw engzatnge an buaina an pumpelh tir? Mipui engzat tan nge boruak ralmuang an siam? Dan bawhchhiatna engzatnge an tihtawp? Rim taka thawktu NGO, CADS, Excise leh Police te hahna engzatnge an chhawk?” ti zawnga ngaihtuahin a lawmawm hle tih a sawi a ni.
Home Minister hian tlawmngai pawlte nen tangruala Operation Trident hmanga ruihhlo tawlhrukna Survey an neiha man tul nia an hriat hmun 38 chu ruahman ang takin an hupfai vek tih pawh sawiin, tun dinhmunah Mizoram-ah ruihhlo a van pharh tawh an rin thu sawiin, “Tunhma chuan ruihhlo tawlhru tuten hlawhfa an rawihte an man thin a, tunah chuan ruihhlo tawlhrutu ber, a kingpin an hup theih tak avangin Mizoram tan a vanneihthlak hle,” a ti.
Central YMA pawhin ‘Operation Trident’ hlawhtlinna tura thawktu zawng zawng chungah lawmthu sawiin, “Ruihhlo hmanga sumdawngte leh eizawn nana hmanga inhnamhnawihte hi kan ram hmelma an ni tih hre thar leh turin mipui kan in chah a ni,” an ti bawk.