NEC Secretary-in Cham-phai-a hmalakna a tlawh
NEC Secretary hian Mualkawi Ginger USP Main Processing Hub bunna tur hmun leh Zotlang Ginger Spoke Hub tur tlawh hmasa in he Hub-ah hian Sawhthing tihfaina, Grade siamna, a chansawmna, phorona leh pack-na tur khawl te bun a ni dawn a. Project hi tan thuai a nih theihna turin chinfel ngai la awm te chak zawk peihfel dan turah a changtu Department te thurawn a pe a, tualchhung Sawhthing chingtute a kawm bawk.
Hemi hnu hian NEC Fund hmanga siam mek Passion Fruit Processing Unit chu tlawhin, thawktute nen an inkawm a. He Processing Unit hi hawn a nih theihna tura hmabak la awmte zirchianga, chak lehzuala hma la turin a hrilh a. Sapthei tui quality tha siamchhuah a nih theih nan kawng engkim ah fimkhur tura chahin, he Processing Unit enkawl tur leh thawktu tur mithiam zawn hmuh tum thuai turin a chah bawk.
Hei bakah hian Tlangsam-a Champhai Winery tlawhin, a enkawltu Champhai Grape Growers’ Society hotute nen an inkawm a. Zu zawrh lama sawrkar policy inthlak thin avangin Grape huan siamtute chuan harsatna an tawh thin thu leh tunah chuan he Winery kaltlang hian huan neitute dinhmun pawh a ziaawm phah thu hrilh a ni a. Mizoram hi hmarchhak State zingah Grape Winery nei awmchhun niin ni khatah Grape Wine case 150 siamchhuah theih a ni.
NEC Secretary chuan Sericulture Department hnuaia Oak Tasar Seed Farm pawh a tlawh nghal a, Department hotute nen inkawmin Champhai chu Mizoram-a Silk chi li (4) – Oak Tasar, Mulberry, Muga leh Eri siamchhuak thei awmchhun a nih thu hrilhin Zokhawthar-a Land Custom Station hotute nen an inkawm bawk a ni.