MUHCS-ah sawrkar leh damdawi In inremna chu a duh apiang tan RTI hmangin dil theih dawn
Mizoram State Health Care Society (MSHCS) leh Mizoram chhung leh pawna mimal damdawi In ten MUHCS hmanga damlo enkawlna tura inremna an siam leh an rate kimchang (detail pricing), RTI hmanga J. Malsawmzuala Vanchhawng, Advocate-in a dilna MSHCS-in a pekchhuah duh loh thubuai kal zelah Gauhati High Court chuan September thla khan thutlukna siamin, MUHCS chu mipuite tana duan leh mipui sum hmanna a nih avangin langtlang taka kalpui tur a nih thu a tarlang a. RTI Act, 2005 in puanzar loh tur chi thil thenkhat a tarlan zingah MSHCS leh Synod Hospital te inremna chu a huam loh avangin inremna chu puanzar ngei tur chi a ni tih a lo nemnghet tawh a. High Court thupek bawhzui hian Mizoram State Chief Information Commissioner (CIC) John Neihlaia chuan MSHCS SPIO, Dr. K. Lalnghinglova chu September ni 23 ralhmaa MSHCS leh Synod Hospital inremna chu a diltu hnena pechhuak tura a hriattir angin he inremna hi a diltu hnenah pekchhuah a ni tawh a ni.
Hetihlai hian Mizoram chhung leh pawna MUHCS Empanelled mimal damdawi In te leh Mizoram sawrkar inremna chu pek chhuah a la ni ve lo thung a. Hemi chungchangah hian CIC John Neihlaia chuan kar kalta Ningani khan thupek thar tichhuakin, he inremna puangzar tur hian harsatna a awm loh avangin MSHCS SPIO, Dr. K. Lalnghinglova chu tun thla October ni 12 ralhma in RTI hmanga diltu-in a hriat duh chu a diltu hnenah pe turin a hriattir a. Mizoram sawrkarin mimal damdawi In te nena MUHCS hmanga damlo enkawlna tura inremna an siam, mipui hriata puangzar lo tura an tanna te chu High Court-in a thiahfai vek tak avangin a duh apiangin RTI hmangin an dil chhuak thei tawh dawn a ni.
MSHCS SPIO-in RTI a chhanna-ah, Deemed Empanelled Hospital te nen inremna ziah a awm lo tih a tarlang a. MUHCS bul tan laia damdawi In nen indawrna kalpui a nih khan MUHCS zawm tura inhawng te chu Deemed Empanelled Status pek an ni a. Heng damdawi In ah te hian MUHCS beneficiary te chuan MUHCS hamthatna pangngai angin enkawlna an dawng thei a, amaherawhchu Empanelled damdawi In angin Cashless treatment a dawn theih loh thung tih an sawi a. Hemi a nih rual hian Scheme kalpui tan tirh te ah tih loh chu an damlo natna a zira loh theih lohna avanga Referral Board-in a phalsak a nih loh chuan Empanelled damdawi In ni lo ah damlo te kal tir an ni lo tih a tarlang bawk a ni.