MUHCS-ah Birla Fertility leh IVF, Guwahati ziahluh an ni

Mizoram Universal Healthcare Scheme (MUHCS) hnuaiah India rama fertility leh IVF network lian berte zinga mi, Birla Fertility leh IVF, Guwahati chu ziahluh a ni ve leh ta a, Birla Fertility leh IVF hotute chuan nimin Aizawl-ah thuthar thehdarhtute kawmin, he hmalakna thar avang hian nau pai harsatna neite chuan Sawrkar tumsak in IVF Treatment an la thei tawh dawn tih an sawi a. Guwahati Centre-a Fertility Specialist Dr. Kalpana Jain pawhin Aizawl lama OPD kaltlanga Specialist rawn theih a ni tur chu natna a hun taka hmuhchhuah leh enkawl nan a pawimawh hle dawn tih a sawi a, anmahni pantu mi tam tak an awm tawh thu te pawh an sawi bawk.

He ruahmanna hnuaiah hian tualchhung Doctor te'n IVF ti tura an rawn te chuan Chief Medical Officer (CMO), Aizawl Office panin Referral leh Authorization an ti thei anga. CMO atanga phalna an hmuh hnuah a tlingte hian Birla Fertility and IVF Guwahati Centre-ah MUHCS kaltlangin sawrkar ruahmanna angin enkawlna an dawng zui thei dawn a ni. Hemi piah lamah hian Aizawl-ah Out-Patient Department (OPD) kaltlangin Specialist Fertility Consultation neih thin a ni bawk ang.

National Family Health Survey (NFHS-5) in a tarlan danin, Mizoram hi India rama nau neih tawh hnua nau pai leh harsat (secondary infertility) vei tam berna State a ni a. IVF enkawlna hi to hle mah se, MUHCS hnuaia empanel a nih tak avang hian nupa tam tak tan sum lama phurrit leh Guwahati thlenga zin chhuah ngai thin chu a sukiang dawn ni a sawi a ni a. Birla Fertility and IVF-a CEO, Abhishek Aggrawal chuan Mizoram sawrkar thawhpuinaah lawmthu sawiin, he Empanelment hian mipuite tan Quality Fertility Care chu awlsam zawk leh man tlawm zawka hmuh theihna a siam dawn thu a sawi bawk a ni.