Mizoram State University a hmalakna tarlang

Higher & Technical Education Minister Dr. Vanlalthlana chuan nimin khan a Pisa-ah thuthar thehdarhtute kawmin Mizoram State University (MzSU) din a nih dan tur leh a Department hmalakna hrang hrangte a sawi a, MzSU Bill chu March ni 4, 2025-a pass a nih hnuah, a hmunpui chu Aizawl atanga sawnin, remchan zawkna avangin Lunglei-ah dah a ni ta a, hei hi February 2026 Mizoram State Assembly Session-ah pass nawn leh niin MzSU dinna tur hian Vice Chancellor leh Registrar la tura nominee zinga mi a inhnuhdawh avangin Search Committee din thar leh a nih thu a sawi. Dr. Vanlalthlana chuan MzSU atan hian post 71 siam a nih tawh thu leh post 21 lak phalna neih a nih tawh thu pawh sawiin, Post thenkhat chu lak tawh niin, a dangte pawh lak mek an ni a, Lunglei-a building luah tur tihfel a nih hnuah chak lehzuala hmalak a nih tur thu a sawi bawk.

H&TE Minister chuan MzSU-a hna lak ah Minister lamhnaite lak an nih chungchanga thuthar thehdarhtute zawhna chhangin, MzSU-a thawk tur lak chungchangah sawrkar inrawlh tumna a awm lo tih sawiin, MzSU hna lak turah an chhung ten an dil dawn pawhin hetiang inbeihna hi a thlen a rinlawk thu leh a chhungte ngei pawh dil lo mai tura tih a neih thu a sawi a. Hetihrual hian hna diltute chu Minister chhungte an nih avanga Merit a an tlin theih loh ngawt thu a awm lo tih a sawi a, hemi chungchanga inbeihna thleng mek hi Court-in a ngaihtuah dawn tih a sawi bawk a ni.

Mizoram Polytechnic Lunglei (MPL) ram chungchangah Dr. Vanlalthlana chuan Supreme Court lamah an kal thleng thei ta hlauh tih a sawi a, “Tunah hian High Court lamah he ram buai chungchang hi a inchiah mek a. Court in thutlukna a siam hun tur erawh a la hriat loh,” tiin a cheithat hna an thawh mek te a sawi bawk.