Mizoram State Museum thar hawn a ni
Mizoram State Museum thar hawn tak hi hi New Secretariat Complex, MINECO, MPSC Office thlen hmaah awmin Gallery pakua (9) awmin Archaeology Section pakhat a awm bawk a, Building thar hi September 18, 2007 khan sak tan niin October 2, 2012 khan sak zawh a ni a, July 25, 2019 khan Art & Culture Department kutah hlan a ni bawk.
Nimin-a Mizoram State Museum hawnna ah hian Art & Culture Minister C. Lalsawivunga chuan hun rei tak atanga hna bul tan Mizoram State Museum a parchhuak ta chu lawmawm a tih thu sawiin, building sakna tura sum petu Ministry of Culture, Govt. of India leh a chhung ruahmanna tur sum petu UD&PA hnuaia SMART CITY te chungah leh a hlawhtlinna atana thawktu te zawng zawng chungah lawmthu a sawi a. Museum chu thil hlui dahkhawmna hmun chauh ni lovin, hnam nun, hnam zia, hnam chanchin leh hnam rohlu te vawn thatna hmun pawimawh tak a nih thu sawiin, “Museum hi hun kal tawh leh tun inkara inzawmna leihlawn hlu tak a nih bakah Hnam identity leh Cultural Heritage humhalh leh hmasawnna kawnga pawimawhna lian tak kengtu a ni bawk,” a ti. Art & Culture Minister chuan Mizoram State Museum hi Multipurpose Museum a nih chhan chu Gallery thlur bing bik awm lova chi hrang hrang phochhuahna a nih vang a ni tih sawiin, Museum a an object neih 50% aia tam hi mi inphal ten an pek a nih thu a sawi bawk.
Nimin-a he hun hman hi Art & Culture Department Joint Director TC. Lalkhuma chuan kaihruaiin Director, Carol VLMS. Dawngkimi chuan report a pe a. Mizoram State Museum hawnnaah hian MPSC Chairman, Mizoram Sawrkar hnuaia Secretary sawmte, Officials dangte, College leh School naupang leh sawmbik te an tel a ni.