Lunglei-ah Victims of Crime Compensation semchhuah a ni

Mizoram State Legal Services Authority (MSLSA) leh Lunglei District Legal Services Authority (DLSA) tangkawp huaihawtin nimin khan Lunglei Ramthar-a Hotel Silver Mount Conference Hall-ah pawikhawihna tuartute hnena zangnadawmna pekna dan, ‘The Mizoram Victims of Crime Compensation Scheme, 2011’ zirhona leh he dan hnuaia zangnadawmna semna hun buatsaih a ni a, Gauhati High Court Judge & MSLSA Executive Chairman, Justice Nelson Sailo chuan Khuallian niin a hmanpui a, Lunglei District Bawrhsap Navneet Mann-i pawhin he hun hi a hmanpui a. He hunah hian pawikhawihna tuartu mi 27 te hnenah zang-nadawmna cheng nuai 118.75 sem chhuah a ni. 

He huna tarlan a nih danin ‘The Mizoram Victims of Crime Compensation Scheme, 2011’ kalpui tan kum 2012 atanga kum 2025 laihawl thlenga Award siamah Mizoram-ah MSLSA kaltlangin pawi khawihna tuartute zangnadawmna Rs. 16,68,52,000/- pekchhuah a ni tawh a. Lunglei District bikah chuan DLSA kaltlang hian kum 2012 atanga kum 2025 thlengin zangnadawmna Rs. 2,43,87,500/- sem a ni tawh bawk.