Kaladan Road Project sawipui
IRCON International Ltd. Myanmar Branch a Project Head, Sanjay Tripathi chuan nimin khan Mizoram Larsap General (Dr) Vijay Kumar Singh chu Aizawl-a Lok Bhavan-ah kawmin Kaladan Multi-Modal Transit Transport Project (KMMTTP) hnuaia Paletwa to Zorinpui inkalpawhna kawng km 109.2 siam meka hmalak tawh chin, hmachhawp leh harsatna awmte a sawipui a. Larsap General (Dr) Vijay Kumar Singh chuan Kaladan Multi-Modal Transit Transport Project chu Sawrkar laipui project ngaih pawimawh leh ngaihtuah hmasak ngai a nih thu sawiin, hun engemawchen atang khan hmalakna te hun bituk aiin a tlai zel a, kan tih khawtlai zel a thiang tawh lova, a hlawhtlin ngei theih nan theihtawp chhuah a ngai a ni, a ti a. A hma thei ang bera zawh a nih theih nana tan la tura chahin, Fur ruahtui hul veleh theihtawp chhuah turin a chah bakah mamawh leh tul angte a hnena thlen turin a chah a, Project zawhfel thuai theih nana theihtawp chhuahpui a inhuam thu a hrilh bawk.
Sanjay Tripathi chuan Paletwa-Zorinpui inkara an hmalak tawh chin leh hmachawpte, harsatna tawh leh pawimawh dangte chu Larsap hi a lem nen a hrilhfiah a.Tun dinhmunah hna za zela 25 thawh zawh a nih tawh thu leh sum ruahman atanga za zela 30 hman a nih tawh thu a sawi bawk.