Insurance-ah ran ziahluh 4,734 zet a awm tawh

Sawrkar laipui hnuaia National Livestock Mission behchhana AH & Vety Department leh National Insurance Company (NIC) thawhhonaa kalpui Animal Insurance-ah ran 4,734 ziahluh a ni tawh a; Vawk thi 382 tan insurance sum Rs. 69,06,400 pek a ni tawh. NIC hotute hnen atanga Akashvani News Aizawl thudawn danin, kumin February ni 10-a tlangzarh tâk Animal Insurance-ah hian Zirtawpni thleng khan District 11 atangin ranvulhtute'n an ranvulh lai 4,734 chu insurance an tihsak tawh a; Insurance hi Vawk, Bawng, Sial, Kèl leh Beram tan tih theih a ni a, Vawk 4,710, Bawng 15 leh Kel 9 insure a ni. Insurance tihsak rante chu khuarel chhiatna leh hri vanga an thih chuan ranvulhtute hnenah NIC hian ranvulh hlutna hù-a chhût pawisa an pe thin a; Zirtawpni thleng khan hri lêng vanga Vawk thi 382 tan NIC hian ran insurance titu ranvulhtute hnenah Animal Insurance kaltlang hian insurance pawisa Rs. 69,06,400 an pe tawh a ni.