Asian Games Gold Medalist Lalremsiami leh Lalthantluangi te Vawiin-ah hmuak dawn
.jfif)
Tarlan tawh angin Mizo nula pahnih Lalremsiami leh Lalthantluangi te telna India Hmeichhe Hockey Team te hian Zirtawpni khan Asian Games 2026-a Hmeichhe Hockey Final-ah China hnehin an champion a, Lalremsiami hian Final-a goal awmchhun leh India Champion-na goal a thun nghe nghe a, kum 44 hnua India Champion lehna hmasa ber a nih bakah Olympic atan an tling nghal a ni.
Ruahman ang chuan Vawiin, October 5, 2026 hian Lengpui Airport an lo thleng dawn a, Airport-a lo hmuah bakah a lawmna pui ber chu Chief Minister Lalduhoma hovin R. Dengthuama Hall, Mualpui Salem Veng-ah Vawiin chawhnu dar 3:00 atangin neih tura rel a ni a. Lawmna programme-ah hian a duh apiang tel turin Sawrkar chuan a sawm a, kal turte chu chawhnu dar 2:30 ah R. Dengthuama Hall-a thlen hman tur a ni ang.
Sports Minister Lalnghinglova Hmar chuan Lalremsiami leh Lalthantluangi te hi Mizo zinga Asian Games-a Gold Medal mai ni lo, Medal hrim hrim la hmasa ber an nih avangin thil hlu bik a nih thu leh Sawrkar pawhin a ngaihlu a, ropui taka lo hmuaha lawmpui a duh tih a sawi a. “An Champion piahlamah Olympic 2028 khel tura an tlin nghal avangin a hlu lehzual a ni,” tiin Sports Incentive Cash Award Scheme hnuaiah cheng nuai 25 ve ve an dawn tur thu a sawi bawk.
Sports Minister hova thukhawm hian Lalremsiami leh Lalthantluangi te hi Lengpui Airport-ah Deputy Speaker Lalfamkima hovin sawrkar leh Sports Association, Mizoram Olympic Association (MOA), United Sports Association of Mizoram (USAM) leh Hockey Mizoram aiawhte’n lo hmuak se tiin Asian Games Gold Medalist leh anmahni hmuaktute chu Lengpui Airport atangin chawhnu dar 1:30 vela rawn chhuakin, Hunthar peng atangin Chanmari lamah an kual chho ang a, Treasury Square atanga Republic Veng leh ITI Veng kaltlangin R. Dengthuama Hall an pan dawn a ni. Hemi paltlang kawng dunga mipui awmte chu an awmhmun theuhah Lalremsiami leh Lalthantluangi te lawmna lo lantir turin ngen an ni.