Huntiam chhunga sawrkar-a PPO thehlut mi 674 an awm

Mizoram sawrkar in Dan diklo-a Pension la te mahni thua pek let (surrender) hun a hawn chhungin mi 674 in an pelet a, dik lo taka pension lo la pekir lo an awm leh awm loh endik hna chu tun thla atang hian Task Force-te chuan an chhui zui dawn.
Mizoram sawrkarin dik tawk lo a Family Pension la te tana mahni thua pek let (surrender) hun a hawn chu kar kalta Thawhlehni, September 30, 2026 khan a tawp a; hun hawn chhung hian pension pelet mi 674 an awm a tih thuneitute chuan an sawi a ni. Accounts & Treasuries hotute chuan, danin a phal loh anga Family Pension la te'n anmahni duh thua an pension lakte an tihtawpna tura Mizoram sawrkarin a ruahman, 'Voluntary Surrender of Pension Payment Order (PPO)' chu kumin July ni 1 atanga September ni 30 chhung khan kalpui a nih thu leh hemi chhung hian mi 674-in pension lakna PPO an surrender tih an sawi a, pension surrender 674 zinga 560 hi Treasury-a surrender an ni a, a bak 114 hi Bank lama surrender an nih thu an sawi bawk.

Huntiam chhunga PPO surrender-te lakah hian sawrkar chuan hremna lek a tum lo a, huntiam chhunga Family Pension lehkha pawimawh pe let lo te, dan lova pension la chhunzawm hmuhchhuah an awm chuan dan angin hremna lek a ni dawn tih sawrkar chuan a lo sawi tawh a, ruahman lawk dan chuan kar kalta atang khan pension surrender lo an awm leh awm loh endik turin Task Force-ten hma an la dawn a. Accounts & Treasuries hotute chuan danin a phal loh anga pension la chhunzawmte thuneitute hnena report-na tur an ruahman thu an sawi bawk.