HPC (D) kut-a thi an dem thu YMA in an sawi

Zirtawpni kalta Oct. 16 2026 zan khan Ngursangzuol Sanate s/o Thanghlira Sanate (L), Sakawrdai Hmar Veng Branch YMA ‘Z Section’ Information Secretary nilai chu HPC (D) kutah a thi nia thudawn a ni a, Sakawrdai Joint YMA leh Central YMA chuan he thil thleng hi an dem thu an sawi a ni.
Sakawrdai Joint YMA thuchhuah chuan Ngursangzuol Sanate hi HPC (D)kut tuara thi nia tarlangin, Oct. 16, 2026 zan khan an In atangin RC Lalropuia, HPC (D) chuan hruai chhuakin, Manipur ram chhunga Lungthulian khuaah an sawisa nia thudawn a ni a, hliam na tak tuarin, a nghawng ruh tliakin a taksa hmun tam takah hliam tuarin a boral phah nia thudawn a ni a. Sakawrdai Joint YMA chuan he thil thleng hi an dem thu leh Ruihhlo tawlh (smuggling) nena inzawm ni ngeia an hriat thu an tarlang a, ngawih mai an tum loh thu an sawi bawk a ni.

Central YMA pawhin nimin khan thuchhuah siamin Ngursangzuol Sanate thihna chu pawi an tih thu an tarlang a. “YMA-in ram pum huapa Ruihhlo Do Kumpuan a kal pui mekah theihtawpin hma lak mek zel a ni a. Ruihhlo do kawngah hian a dodal zawng emaw, ruihhlo dotute tana harsatna siam zawnga che te chu eng ang mi pawh ni se Central YMA chuan a hmachhawn zel ang,” tiin he thihna a inhnamhnawih ten an phu tawk hremna an hmuh ngei theih nan hma an lak zel dawn thu leh tun hnuah hetiang hi thleng tawh lo se an duh thu an tarang a ni.