Govt. Champhai College-a hmalakna te hawn a ni
Ramchhung a zirna In sang te tihhmasawnna tura hmalakna PM-USHA hnuaiah hian First Phase-ah Mizoram atangin College pahnih lak phawt an ni a, heng te hi Govt. Champhai College leh Kolasib Govt. College te niin Govt. Champhai College-ah hian Contractor chu Tiberia, Zotlang, Aizawl an ni a, February 12, 2025-ah hna an thawk tan a, kumin July ni 15 khan an thawk zo a, huntiam chhunga hna hi thawk zo in Kolasib Govt. College-a hna pawh thawh zawh a ni tawh bawk a. Govt. Champhai College-a hnathawh zawh tawh, nimin-a Chief Minister in a hawn tak te hi cheng nuai 370 senga thawh Classroom/Building sak te; cheng nuai 40 senga Multipurpose Hall chei that te; cheng nuai 40 senga siam Mini Running Track leh cheng nuai 50 senna Solar Plant, Vocational Skill, personality development programmes, Workshop, IT & Lab equipment leh Solar equipment-te an ni.
Heng hmalakna thar te hawnna neih a nih rual hian College Week kharna hun hman nghal niin Chief Minister Lalduhoma chuan Champhai College-ah hian amah ngei pawh a lut tawh tih sawiin, 1st Batch an nih thu leh khatih hunlai-a an dinhmun nena khaikhin chuan tunah chuan an lo changkang ta hle tih a sawi a, “Mizoram-a sawrkar Multi-Displinary College nei zinga Stream ngah ber in lo ni ta a ni. Hmunhma in nei tha a, Mizoram State University a puitlin hunah chuan University Campus in nih zui ngei pawh a rinawm a ni,” a ti a. Tunhnai lawkah he College Hostel sak zawmna tur hi cheng nuai 50 an pawm fel leh thu pawh sawiin, “Retaining Wall leh Parade Ground siamna tur pawh kan pe ang che u,” a ti bawk.
Chief Minister chuan Infrastructure lamah chuah an thuam tha lo tih pawh sawiin, “Zirtirtu (Assistant Professor) hi RUSA atangin pali (4) kan dah belh tawh a, BCA lamah Assistant Professor pali tho kan dah thar a, Contractual Faculty pathum, tuna thawk mekte pawh dahngheh turin order siam fel vek tawh a. Zirtirtu thar pariat kan pe tihna a ni. Heng zawng zawng hi zirna sang zawk lama Mizoram leh Champhai District-in hma kan sawn zelna atana kan hmalakna leh NEP 2020 thiltum tihhlawhtlinna a ni,” a ti bawk.
PM USHA Project hawnna inkhawmah hian Lalthanpuia, Principal, Govt. Champhai College chuan inlawmna sawiin, he College-ah hian zirlai 589, Faculty Regular 32, Contract 5, Casual 19, Part-Time pakhat bakah Non-Teaching Staff 15 an awm a ni.