Falkawn-a Living Museum-in kum khat tling; mi 9600 chuangin an tlawh tawh

India rama Living Museum hmasa ber leh awmchhun, Art & Culture Department-in Zokhua (Mizo Typical Village), Falkawn-a chawlhkar tin Inrinni apianga an buatsaih ‘Living Museum’ chuan kum khat a tling ta a, hemi pual hian Inrinni khan I&PR Director Mina Zoliani Joute leh Art & Culture Deputy Secretary Lalengvari bakah Official dang ten ‘Living Museum’  hi an tlawh a ni.
Living Museum hi Art & Culture Department bultumin Falkawn khuaa NGO hrang hrang – YMA, MUP leh MHIP te nen thawhhona tha tak neia kalpui a ni a. Ministry of Tribal Affairs, Govt., of India chuan Mizoram State in Living Museum tha tak an buatsaih hi tha a ti em em a, India rama State leh UT dang zawng zawngte hnenah Living Museum buatsaih tur leh Living Museum an neih theihna tura ruahmanna siam ve turin a hriattirna a chhuah nghe nghe a ni.

Falkawn-a Living Museum hi ramchhung leh ram pawn atangin tlawhtu an thahnemin ngaihhlut a hlawh hle a, a bikin ram pawn atanga lo kal Tourist ten an tlawh nasa hle a. Falkawn-a Zokhua (Mizo Typical Village) hi kum 1992 khan din a ni a. Mini Live Museum atana buatsaih niin hmanlai kan pipute hun laia Mizo Khua anga siam leh cheibawl a ni a. Kum 2011 khan a vawi khatna atan hmanlai Mizo nun a taka entirna, ‘Live Demonstration of Mizo Typical Life’ hi neih niin a hming atan ‘Mizo Nun Kutpui’ tih a ni a. Kum 2023 khan India ramin G-20 Summit a thlen denchhenin Summit Palai te pual leh Chapchar Kut lawmna pakhat atan ni thum chhung ‘Live Demonstration of Mizo Typical Life’ hi neih leh a ni a, a hming atan ‘Zonun Kutpui’ tih a ni a; kum 2024, 2025 leh 2026 khan Chapchar Kut pualin ni hnih chhung buatsaih leh a ni bawk.

Tunah hian thangthar leh naupang zawkte’n Mizo nun ze mawi leh chin dan hrang hrangte a tak ngeia an hmuh leh an tem theih nan te, zirlai naupangte tana tangkai tur leh an zirlaibu-a awmte an hriatthiam lehzual theih nan te, khualzin lo pung zel ten kan hnam nun an hmuhfiah theihna turin Art & Culture Department chuan kartin Inrinni apiangin Hmanlai Mizo Nun Entirna - ‘Living Museum’ hi October 25, 2025 (Inrinni) atang khan Living Museum hi a buatsaih tan a. Tun thleng hian Living Museum tlawhtu hi mi 9600 an chuang tawh a, tlawhtu zinga a zatve zel hi rampawn atanga Mizoram rawn tlawhtu Tourist te an ni.

Living Museum hi Inrinni apiangin Rs. 200/- chawiin a  tlawh theih a; Govt. Middle School leh a hnuai lam tan 50% concession siam a ni a. Show hi hun hnihah then niin First Show chu 11:00 AM - 01:00 PM-ah neih a ni a, Second Show chu 01:30 PM - 03:30 PM-ah neih a ni a, Mizo nundan chi hrang hrang, heng - Live Demonstration of Mizo Village Life, Traditional Dance, Folk Song & Dance, Indigenous Games, Traditional Cuisines, Traditional Costumes te entir thin a ni a, Mizo hnam thuam chi hrang hrang man chawia hak hawh theih a chhawpchhuah thin a ni bawk.