Dan dik lova pension la te tana PPO thehluh hun tawpin Serchhip District-ah mi 16 in an thehlut

Mizoram sawrkarin dik tawk lova Family Pension la te tana mahni thua peklet (surrender) hun a siam chu nimin, September 30, 2026 khan a tawp ta a, Serchhip Treasury-ah atanga Pension la zingah surrender mi 17 awmin Vawiin October 1, 2026 atangin dan dik lova Family Pension la te zawngchhuak turin Task Force-te an thawkchhuak dawn a ni.
Mizoram sawrkar hnuaia Dan dik lova Family Pension la te’n mahni duh thu (voluntary) ngeia Pension Payment Order (PPO) an thehluh hun tura sawrkar in ruahmanna a siam chu nimin khan a tawp ta a, hriat theih chinah Mizoram pumah mahni duhthlanna a PPO thehlut hi mi 490 vel an awm nia thudawn a ni a. Serchhip-a District Treasury hnuaia Pension la zingah pawh PPO thehlut mi 17 awmin heng te hi Treasury-a thehlut mi 13 leh Bank direct (Central Pension Processing Centre) mi 4 te an ni a. Nimin thleng khan Serchhip-a District Treasury atang hian Pension la mi 1460 an awm mek a. An zinga a tam ber mi 1031 te chu Superannuation pension la niin Family Pension la mi 429 an awm bawk a, Pension la zat hi a danglam ve deuh reng a ni.

Finance Department chuan kumin June 16 khan ‘Dik tawk lova Family Pension la te surrender-na hun hawn chungchang’ tih thupui hmangin Office Memorandum an chhuah tawh a; September 30 hnua dan lova pension la an la awm chuan sawrkarin hma a la zui dawn tih an sawi a. October 1, 2026 atangin dan lova Family Pension la te zawngchhuak turin District tinah Task Force an che chhuak dawn a; Task Force hian hma an lakna ah a tul angin YMA Branch-te leh pawl dangte an thawhpui dawn a. Hemi atan hian Central YMA chuan YMA Branch tin hnenah lo thawhpui tura ngenna chu kumin July 22 khan a tichhuak tawh a ni.

Huntiam chhunga Family Pension lehkha pawimawhte pe let lo, dan lova Pension la chhunzawm hmuhchhuah a nih chuan Task Force Leader hmingin Show Cause Notice pek tur a ni dawn a; hemi hnuah a tul dan azirin Police Station hnai berah thubuai ziahluh a nih tur thu te pawh an lo puangzar tawh a ni.