Civil Hospital, Lunglei-a hman tur Ambulance hlan
He Ambulance hi Chief Ministers Charitable Trust hmalaknain Rays Power Infra Ltd. te CSR hmanga lei a ni a. Rays Power Infra Ltd hotute hian Chief Minister hnena an hlan hnuah Chief Minister hian a hmangtu tur Health & Family Welfare Department hotute hnenah a hlan ve thung a ni. Chief Minister hian an CSR Fund hmanga Mizoram tana hna an thawh avangin Rays Power Infra Ltd. te chungah lawmthu a sawi a. Mizoram chu India rama CSR dawng tlem ber State zinga mi kan ni tih sawiin, Fund tam tak seng kher lo pawhin thil tha, State pumpui tana tangkai thawh theih a tam thu sawiin, “Corporate lian ten an CSR hmangin tam zawkin hma rawn la se kan duh em em a. Rays Power Infra Ltd. te pawhin hma min laksak chhunzawm zel se kan duh hle a ni,” a ti bawk.
He Ambulance thar hi Chief Minister Lalduhoma hnen atangin H&FW Department Addl. Secretary Lalnunmawii leh Dr. Lucy Ramhmingliani Renthlei ten an dawng a, Rays Power Infra Ltd. lam atangin Siddarth Sharma, CA, North East Commercial & Finance Head leh Gordhan Sharma te an rawn tel a. Anni bakah hian Chief Minister’s Charitable Trust atangin CEO R. Lalrodingi bakah Secretary Raymond Lalmuana leh Member Lalrinawma Khiangte te an tel bawk.