Chawchhun chhumtute training-na tur Portal tlangzarh

School Education Minister Dr. Vanlalthlana chuan chawchhun chhumtute training-na tur Portal (Cook-cum-Helpers training Portal) chu Mizoram Sawrkar hnuaia PM POSHAN (Mid-Day Meal) semna Primary leh Middle School-a chaw chhumtu te leh Zirtirtuten tangkai taka an hman atan a tlangzarh.

School Education Directorate Conference Hall-a Cook-cum-Helpers training Portal tlangzarhna hun niminpiah a neih ah hian School Education Minister Dr. Vanlalthlana chuan chawchhun buatsaih chungchangah hma an sawn zel thu leh naupang ten ei tur tha an neih theih nana Department hotuten Central-a an buaipui dan chu lawmawm a tih thu a sawi a. Chaw chhumtute hlawh pawh tihpun a nih thu te, Central-in cook pakhat tan Rs. 900 a rawn pek State sawrkarin Rs. 600-a a lo do let thin chu State sawrkarin Rs. 2100-ah tihsan a nih thu leh Central sawrkar pek nen Rs. 3000/- an hlawh tak thu a sawi. Chaw chhun siamna atana Central-in pawisa a rawn pek chu KG atanga Class V thleng hian naupang pakhatah Rs. 6.11 leh Class VI atanga Class VIII thlengin Rs. 7.35 an rawn pek thu leh State-in Re. 1-a a lo do let thu a sawi a. Chaw chhumtute tana training portal hawn a ni ta chu lawmawm a tih thu a sawi bawk.

He Portal hi chaw chhumtuten naupangte tana ei tur thianghlim leh hrisel, an taksa mamawh ang mil zela chaw leh chawhmeh an siam a, ei leh in thianghlim lo leh hrisel lo laka naupangten harsatna an tawrh lohna tura in zirtirna tur a ni a. He training Portal-ah hian PM POSHAN scheme hnuaia chaw chhumtu zawng zawngte chu an in register anga, training video kimchang takin an en thei dawn a. Training video an en zawh apiangin portal chhungah hian an thiam leh thiam loh enfiah nan test paltlang zel tur a ni dawn a. Heng test an paltlang hnu hian chaw chhumtute chuan Completion Certificate an dawng dawn a ni.